Ушаков Зеленскийни Москвага таклиф қилди

Россия Президенти ёрдамчиси Юрий Ушаков Владимир Путин Украина Президенти Владимир Зеленский қўнғироқ қилса, у билан телефонда гаплашишини айтди. Шу билан бирга, у Украина раҳбарига Путин билан юзма-юз учрашиш учун Москвага келишни таклиф қилди. Бу ҳақда “Meduza“ хабар берди.

Россия давлат телевидениеси мухбири Павел Зарубин Ушаковдан Зеленский қўнғироқ қилса, Путин жавоб берадими, деб сўраган.

“Менимча, албатта, жавоб беради. Путин ҳеч қачон суҳбатлашишдан бош тортмаган“, деган Ушаков.

Унинг айтишича, агар Зеленский Путин билан гаплашмоқчи бўлса, Москвага келиши мумкин.

“У турли манбалар орқали хабарлар юборяпти. Агар у ҳақиқатан ҳам музокара ўтказмоқчи бўлса, Москвага келсин“, дея қўшимча қилган Россия Президенти ёрдамчиси.

Зеленский аввал ҳам Путин билан Дональд Трамп иштирокида исталган нейтрал ҳудудда учрашишни бир неча бор таклиф қилган. Кремль эса бунга жавобан Украина президенти Москвага келиб, Путин билан юзма-юз учрашиши мумкинлигини билдирган. Шунингдек, унинг хавфсизлиги кафолатланишини маълум қилган.

Эслатиб ўтамиз, аввалроқ Юрий Ушаков Россия, АҚШ ва Украина ўртасида Россия-Украина урушини якунлаш бўйича тинчлик музокаралари жорий йилнинг 4 ноябридан кейин Абу-Дабида ўтказилиши кутилаётганини маълум қилган эди.