Уруш қишда ҳам давом этади – Зеленский

Украина Президенти Владимир Зеленский уруш қишда ҳам давом этиши мумкинлигини айтди. Бу ҳақда у кеча, 6 сентябрь куни Киевга келган АҚШ Президенти Дональд Трампнинг махсус вакиллари Стив Уиткофф ва Жаред Кушнер билан учрашувдан сўнг маълум қилди.

Зеленскийга кўра, Украина янги эҳтимолий ҳужумлар ва қиш шароитларига тайёргарлик кўришда давом этмоқда. Шу сабабли, музокаралар билан бир қаторда Украина ҳаво ҳужумидан мудофаасини кучайтириш, энергетика инфратузилмасини ҳимоя қилиш ҳамда аҳолининг қиш ойларидаги эҳтиёжларини таъминлаш масалалари ҳам муҳим бўлиб қолмоқда.

Шунингдек, Зеленский учрашувда АҚШ Президенти Дональд Трамп музокараларда етакчи ролни ўз зиммасига олиши Украина учун ниҳоятда муҳим эканини таъкидлаган. Шунингдек, у урушни шунчаки тўхтатиш эмас, балки Россиянинг келажакда Украинага яна ҳужум қилиш имкониятини истисно этадиган “адолатли тинчлик”ка эришиш зарурлигини айтган.

“Биз оғриқ ва ўлимни истамаймиз. Бу уруш адолатли тарзда ва Россиянинг Украинага қарши тажовуз қилиш имконияти қолмайдиган тарзда якунланишини истаймиз”, деган Зеленский.

Зеленский дипломатик ташаббусларга қарамай, уруш яқин вақт ичида якунланмаслиги мумкинлигига ҳам эътибор қаратган. Украина раҳбари уруш бутун қиш давом этиши эҳтимолини қайд этиб, мамлакат янги ҳужумлар ва оғир қиш шароитларига тайёргарликни давом эттираётганини билдирган.

Бундан ташқари, Зеленский Россия, Украина ва АҚШ иштирокида уч томонлама учрашув ўтказишни исташларини билдирган.

Трампнинг махсус вакили Жаред Кушнер эса АҚШ Президенти Дональд Трампнинг мақсади шунчаки урушни тўхтатишдан иборат эмаслигини айтган. Кушнер Украинада узоқ муддатли тинчликни таъминлаш учун шароит яратиш зарурлигини таъкидлаб, келгусидаги келишувлар янги уруш бошланиши эҳтимолини истисно қилиши кераклигини билдирган.

Кушнер, шунингдек, Украина уруш йилларида намоён қилган кучи ва ижодкорлигини мамлакатни ривожлантиришга йўналтириш имконини берадиган жараён устида ишлаётганларини айтган.

Стив Уиткофф эса Зеленский билан учрашувни “жуда самарали” деб баҳолаб, музокараларни давом эттиришга тайёр эканини билдирган.

“Биз руҳландик ва қанча вақт талаб қилинса, шунча вақт ишлашга тайёрмиз”, деган у.

Эслатиб ўтамиз, АҚШ Президенти Дональд Трампнинг махсус вакили Стив Уиткофф ва куёви Жаред Кушнер жорий йилнинг 5–6 сентябрь кунлари Москвага, шундан сўнг Киевга бориши мумкинлиги ҳақида хабар берилган эди. Шундан сўнг, АҚШ Президенти Дональд Трамп улар Россия ва Украина ўртасидаги урушни якунлаш бўйича тинчлик келишувига эришиш учун хорижга йўл олишини маълум қилган. Жорий йилнинг 5 сентябрь куни улар Москвага етиб борган эди. Шундан сўнг, Россия Президенти Владимир Путин АҚШ Президенти Дональд Трампнинг вакиллари Стив Уиткофф ва Жаред Кушнер билан музокара ўтказган.