Россия билан музокараларнинг натижаси яқин – Зеленский

Украина Президенти Владимир Зеленский Россия билан олиб борилаётган музокараларнинг дастлабки натижалари сентябрь охиригача пайдо бўлиши мумкинлигини айтди. Бу ҳақда Зеленский Канадада ОАВ вакиллари билан суҳбатда сўз очди.

Зеленскийга кўра, бу натижалар дон экспорти ва энергетика масалаларига тааллуқли бўлиши мумкин.

Зеленскийнинг қайд этишича, Россияда жорий йилнинг 20 сентябрь куни бўлиб ўтадиган парламент сайловлари даврида жиддий музокаралар ўтказилиши кутилмаяпти. Бироқ сентябрь охирида Нью-Йоркда АҚШ вакиллари билан учрашув ўтказиш имконияти бор.

“Шу давр мобайнида ҳар куни менинг маслаҳатчиларим ва миллий хавфсизлик бўйича маслаҳатчилар Америка жамоаси билан алоқада бўлмоқда”, деган Зеленский.

Президент сентябрь охиригача музокараларнинг дастлабки натижаларига эришиш имконияти борлигини қайд этган. Шунингдек, Зеленский ой охирида Нью-Йоркда АҚШ Президенти Дональд Трамп билан учрашиши режалаштирилганини айтган.

“Ҳозир биз энергетика ва озиқ-овқат хавфсизлиги бўйича эҳтимолий натижалар масаласини кўтаряпмиз. Менимча, бунга эриша оламиз. Нью-Йоркда Президент Трамп билан учрашувдан кейин бу ҳақда очиқроқ гапира оламан. Умид қиламанки, бунинг учун имконият топамиз”, деган у.

Зеленский дон экспорти масаласи фақат Украина ва Россияга эмас, балки бутун дунёга тааллуқли муаммо эканини таъкидлаган.

У сўнгги бир неча ой давомида Миср, Ҳиндистон, Бирлашган Араб Амирликлари, Саудия Арабистони ва АҚШ билан муҳим музокаралар ўтказилганини айтган. Ушбу давлатларнинг барчаси озиқ-овқат таъминотининг бутун дунё учун тўсиб қўйилиши катта муаммо эканини билдирган.

“Бу фақат украиналиклар ёки россияликлар учун эмас, балки бутун дунё учун муаммо. Озиқ-овқат хавфсизлиги жуда муҳим ва биз бунга тайёрмиз. Бу қандай амалга оширилиши мумкинлигини муҳокама қилдик ва ўз қарашларимизни билдирдик. Аммо бу россияликларга боғлиқ”, деган Украина Президенти.

Эслатиб ўтамиз, аввалроқ Украина Президенти Владимир Зеленский Россия билан дон экспорти ва энергетика масалаларида муроса излашга тайёрлигини, бироқ келишувга эришиш учун ҳар икки томон ҳам қадам ташлаши кераклигини айтган эди.