Украина Россиянинг 2500 км ичкарисидаги Ozon омборига зарба берди

World

−

22:00 visibility1027 timer2 minutes

Бугун, 24 октябрь куни Украина дронлари Россиянинг Омск вилоятига ҳужум қилди. Бу ҳақда ҳудуд раҳбари Виталий Хоценко маълум қилди.

Унинг маълумотларига кўра, дронлар Украина чегарасидан 2,5 минг км узоқликда жойлашган Омскнинг “шимолий саноат тугунига кириб борган”. Ҳужум жойига фавқулодда хизматлар етиб борган. Вилоятда дрон хавфи ҳақидаги дастлабки хабарлар маҳаллий вақт билан соат 16:00 атрофида туша бошлаган. Топшириқлар оралиғида Омск аэропорти ёпилган. Украинанинг “Exile+” мониторинг канали маълумотларига кўра, ракета ёнилғиси учун хомашё ишлаб чиқарувчи “Омский каучук” АЖ ва “Солнечный” логистика паркидаги йирик Ozon омбори зарбага учраган. Иккала объектда ҳам ёнғинлар чиққан.

“Омский каучук” “Титан” холдинги таркибига киради ва синтетик каучук, фенол, ацетон ҳамда бошқа кимёвий маҳсулотлар ишлаб чиқаришга ихтисослашган. Корхона қуввати – суткасига қарийб 2000 тонна материал. Завод томонидан чиқариладиган синтетик полимерлар техника учун шиналар ишлаб чиқаришда, махсус полимер боғловчи материаллар эса қаттиқ ракет ёнилғисини тайёрлашда қўлланилади. Бундай турдаги двигателлар, хусусан, “Искандер”, “Тополь” ва “Ярс” комплекслари ракеталарида ишлатилади. Канал маълумотларига кўра, шунингдек, майдони 107 000 квадрат метрдан ошадиган Ozon омборхона мажмуасига ҳам ҳужум қилинган. Хоценко “Омскдаги логистика марказларидан бирига” қилинган зарбани тасдиқлаган ва ходимлар эвакуация қилинганини маълум қилган.

Деярли 30 миллион дона товар сиғдира оладиган ва суткасига 600 000 дан ортиқ буюртмани қайта ишлай оладиган, ҳужумга учраган Ozon хаби тепасида улкан тутун устуни кўтарилган. 2024 йилда Ozon ушбу объектга киритилган инвестицияларни 4 миллиард рублдан ортиқ деб баҳолаган. Маркетплейс матбуот хизмати Омскдаги омборда содир бўлган ёнғин Украина дронлари ҳужумидан сўнг бошланганини билдирган.

Геолокацияга асосланган “Supernova+” дастлабки маълумотларига кўра, дронларнинг тегиши метил-трет-бутил эфири ишлаб чиқаришга мўлжалланган Д-3 ва Д-5 қурилмалари ҳудудида қайд этилган. Метил-трет-бутил – бу автомобиль бензинини тайёрлашда қўлланиладиган юқори октанли қўшимча.