Украина Россияга зарба бериш учун Starlink’дан фойдаланмоқчи

Украина Илон Маскдан Россия ичкарисига зарба бериш учун Starlink тизими билан жиҳозланган зарба берувчи дронлардан фойдаланишга рухсат олишга ҳаракат қилмоқда. АҚШ Президенти Дональд Трамп ушбу режани қўллаб-қувватламайди. Бу ҳақда “Financial Times” газетаси хабар берди.

Нашр суҳбатдошларининг сўзларига кўра, Украина Президенти Владимир Зеленский ушбу ғояни июль ойида Оқ уйда Трамп билан ўтказилган учрашувда илгари сурган. У Трампдан Маск билан гаплашишни ҳамда Украинага ўз чегараларидан ташқарида – Россия ҳудудининг 200 км ичкарисида жойлашган баллистик ракета учириш қурилмаларига зарба бериш учун Starlink’дан фойдаланишга рухсат олишда ёрдам беришини сўраган.

Starlink билан жиҳозланган дронлар SpaceX сунъий йўлдош интернетидан фойдаланади. Бу уларга одатдаги радиоканалларга қараганда узоқ масофаларда операторлар билан ишончлироқ алоқани сақлаб туриш ва шу билан бирга оддий халақитларда кучлироқ бўлиш имконини беради.

Киев ушбу зарбалар чуқурлигини чеклаш Маскни сўровни тасдиқлашга ундаши мумкин деб ҳисоблайди. Бироқ учрашувда иштирок этганларнинг сўзларига кўра, Трамп бу ғояга шубҳа билан қараган: у аниқ жавоб бермаган ва, афтидан, ушбу режани қўллаб-қувватламаган. 

FT суҳбатлашган мулозимларнинг фикрича, Маск ҳам бу сўровни маъқулламайди. Аввалроқ унинг Украина томонидан Starlink’дан фойдаланиш масаласидаги позицияси бир неча бор ўзгарган эди. 

Эслатиб ўтамиз, аввалроқ Россиянинг Пермь шаҳридаги “Лукоил-Пермнефтеоргсинтез” нефтни қайта ишлаш заводи Украина дронлари ҳужумига учраган эди.