Украина Москвани бомбардимон қилди. Минглаб одамлар электрсиз қолди

Украина кеча, 17 август кечидан бугун, 18 август тонгигача Москва вилояти томон 620 та дрон учирди. Ҳужум оқибатида Москва вилоятида уч киши жароҳатланди, Wildberries компаниясининг омбори ҳам шикастланди. Бу ҳақда Москва мэри Сергей Собянин маълум қилди.

Собяниннинг сўзларига кўра, ҳужум вақтида 180 та дрон йўқ қилинган. Кейинчалик мэр Москва томон учиб келаётган яна 17 та дрон уриб туширилганини билдирган.

Москва вилояти губернатори Андрей Воробёвнинг маълум қилишича, тун ва эрталаб давомида Москва вилояти осмонида 150 дан ортиқ дрон уриб туширилган. Раменское округида дрон хусусий уйга қулаши оқибатида 10 ёшли қиз жароҳатланган. Богородское округида бир аёл, Коломнада эса 27 ёшли эркак жароҳатланган.

Губернаторнинг қайд этишича, ҳужумнинг энг жиддий оқибатлари Павловский Посад округида кузатилган. Кузнеци қишлоғида хусусий уй ёниб кетган, Павловский Посадда эса кўп қаватли уйнинг томида ёнғин чиққан. “Мособлэнерго” маълумотларига кўра, округда 5 мингдан ортиқ киши ва ижтимоий аҳамиятга эга 46 та объект электр таъминотисиз қолган.

Ногинскда дрон Атлант-парк ҳудудидаги Wildberries омборига келиб тушган. Губернаторнинг маълум қилишича, ёнғин бартараф этилган ва ҳодиса оқибатида ҳеч ким жабрланмаган. Маркетплейс матбуот хизмати логистика мажмуасига озгина зарар етганини билдирган. Қайд этилишича, дрон бўлаклари бино деворига теккан. Компания ходимлари ҳужумдан олдин эвакуация қилинган, омбордаги товарларга зарар етмаган.

Коломнада ҳужум оқибатида “Глобус” савдо маркази яқинидаги савдо павильонида ёнғин чиққан. Шунингдек, ФҲДЁ биноси, дўкон ва Советская майдонидаги турар жой биносининг ойналари шикастланган.

Котельники шаҳрида қурилаётган турар жой мажмуасидаги қурилиш искалалари ёниб кетган. Электросталда эса автомобиль ва трансформатор подстанциясига зарар етган. Раменское ҳамда Богородское шаҳар округларида ҳам хусусий уйлар шикастланган.

Эслатиб ўтамиз, аввалроқ Украина Миллий гвардиясининг 1-корпуси – “Азов” бўлинмалари Донецк вилоятининг Россия томонидан босиб олинган ҳудудларида жойлашган бир қатор ёнилғи сақлаш ва таъминот объектларини йўқ қилганини маълум қилганди.