Украина Белгородга бомба ёғдирди. Қурбон бор

Бугун, 25 октябрга ўтар кечаси Украина куролли кучлари Белгородга оммавий равишда ҳужум қилди. Оқибатда бир киши ҳалок бўлди, яна 14 киши тан жароҳати олди. Бу ҳақда ҳудуд губернатори Александр Шуваев маълум қилди.

Унинг сўзларига кўра, жабрланганларнинг саккиз нафари шаҳар шифохоналарининг стационар бўлимларида қолмоқда. Зарур бўлган тақдирда улар федерал клиникаларга юборилади. Олти киши эса амбулатор шароитда даволанмоқда.

Шуваевнинг айтишича, ҳужум давомида 30 та кўп қаватли ва тўртта ҳовли уй, шунингдек, учта маъмурий бино, саккизта тижорат ва учта ижтимоий объект зарар кўрган. Бундан ташқари, 35 та автомобилга шикаст етказилган. Белгород мэри Валентин Демидов “уй-жой фондининг сезиларли даражада вайрон бўлгани”ни айтган ва 53 киши вақтинчалик жойлаштириш пунктлари хизматидан фойдаланишга қарор қилганини маълум қилган.

“Пепел” маълумотларига кўра, дронлар “МегаГринн” савдо-кўнгилочар марказига ва “Париж” турар жой мажмуаси ҳовлисига тушган. Украинанинг “Supernova+” мониторинг канали ҳам майдони 163 минг квадрат метрдан ошадиган “МегаГринн” савдо-кўнгилочар марказига берилган зарба ҳақида ёзмоқда. Бугун, 25 октябрь куни эрталаб объект маъмурияти ҳеч қандай сабабларни изоҳламасдан, марказ ишламаётганини маълум қилган.

Бундан ташқари, Украина Қуролли кучлари Курск вилоятига ҳам ҳужум қилган. Губернатор Александр Хинштейннинг хабар беришича, Хомутовка туманида энергетика объекти зарар кўрган, оқибатда 104 та аҳоли пункти ва уларда яшовчи 11 мингга яқин истеъмолчи электр таъминотисиз қолган. Большесолдатский туманининг Козиревка қишлоғида FPV-дрон автомобилга ҳужум қилиб, 30 ёшли эркак жароҳат олган.

Липецк шаҳрининг Бунин кўчасида тўхтаб турган бир нечта автомобиль ёниб кетган. Вилоят губернатори Игорь Артамонов бунга дрон парчаларининг тушиши сабаб бўлганини айтган, бироқ маҳаллий чатларда шаҳар аҳолиси бу даъвога шубҳа билдирмоқда. Уларнинг айтишича, атрофдаги уйларнинг 11-қаватигача “дереза ромлари ва ойналари учиб кетган”. Уларнинг сўзларига кўра, жабрланганлар бор.

Ростов вилояти губернатори Юрий Слюсарь кечаси вилоятнинг бешта туманида: Верхнедонской, Миллерово, Кашары, Чертково ва Шолохов туманларида 50 дан ортиқ дрон йўқ қилинганини маълум қилган. У жабрланганлар ҳақида маълумот тушмаганини қўшимча қилган.

Россия Мудофаа вазирлиги мамлакатнинг 22 та ҳудуди, аннексия қилинган Қрим ва Азов денгизи акваторияси тепасида Украинанинг 532 та дрони йўқ қилингани ҳақида ҳисобот берган.

Эслатиб ўтамиз, аввалроқ Украина дронлари Россиянинг Омск вилоятига – Россиянинг 2500 км ичкарисидаги Ozon омборига ҳужум қилгани ҳақида хабар берилган эди.