Украина 100 йил ичида илк бор пўлат эритишни бутунлай тўхтатди

Жорий йилнинг сентябрь ойида Украина металлургия саноатида мутлақ антирекорд қайд этилди. Сўнгги 100 йил ичида илк бор мамлакат корхоналари бир тонна ҳам пўлат эритмади. Бу ҳақда Киевда бўлиб ўтган Иқтисодий барқарорлик форумида “Метинвест” холдинги бош директори аппарати раҳбари Александр Водовиз маълум қилди. 

Қайд этилишича, “эришилган” ноль кўрсаткич анъанавий равишда экспорт ва солиқ тушумларининг асосий улушини шакллантириб келган давлатнинг бутун пўлат қуйиш тармоғи тўхтаганини англатади.

Металлургия циклининг тўлиқ тўхташига Россиянинг соҳанинг асосий объектларига берган ракета зарбалари асосий сабаб бўлган. Хусусан, “Запорожсталь” металлургия комбинати ва бошқа йирик пўлат эритиш заводлари инфратузилмасининг шикастланиши ишлаб чиқариш жараёнини фалаж қилиб қўйган.

“Метинвест” холдинги вакилларининг баёнотига кўра, Украинанинг деярли барча асосий металлургия қувватлари шикастланган. Базавий цехларнинг ишдан чиқиши ва энергетика инфратузилмасининг шикастланиши узлуксиз эритиш циклини ушлаб туришни имконсиз қилиб қўйган.

Водовиз зарур молиялаштириш ҳажми ва таклиф этилаётган давлат қўллаб-қувватлови ўртасидаги сезиларли тафовутни қайд этган. Унинг маълумотларига кўра, расмийлар “Метинвест”га 2 дан 5 миллион гривнагача миқдорда ёрдам таклиф қилган, ваҳоланки битта саноат печининг қиймати тахминан 500 миллион долларни ташкил этади, уни ишга тушириш харажатлари эса 50 миллион долларга баҳоланмоқда. “Метинвест” ихтиёрида эса бешта шикастланган печ бор, Arcelor корхонасида эса иккита.

Эслатиб ўтамиз, аввалроқ Россия кучлари Украина ҳудудларига ҳужум қилгани ҳақида хабар берилган эди. Киевда зарба оқибатида 2 киши ҳалок бўлиб, камида 8 киши жароҳатланган.