Ўқувчиларга дарсларга қатнашгани учун минг долларгача берилади

АҚШнинг Детройт шаҳрида мактаб ўқувчиларини дарсларга аъло даражада қатнашгани учун моддий рағбатлантириш дастури узайтирилди ва кенгайтирилди. Бу ҳақда “Chalkbeat Detroit” нашри хабар берди.

Қайд этилишича, қолдирилмаган ҳар бир ўқув ҳафтаси учун юқори синф ўқувчиларига номинали 100 доллар бўлган электрон совға карталари берилади. Бир ой давомида интизомли ўқувчи 400 доллар ишлаб топади, қишки 10 ҳафта учун максимал тўлов эса 1 минг долларга етмоқда.

Молиявий рағбатлантириш юқори самарадорликни кўрсатган: 2026 йилнинг январь ойидан март ойигача 12 минг 800 га яқин юқори синф ўқувчилари ёки округдаги жами юқори синф ўқувчиларининг 84 фоизи пул мукофотларини олган. Натижада юқори синф ўқувчилари ўртасида дарсларни сурункали қолдириш даражаси 64 фоиздан 54 фоизгача камайган.

2026-2027 ўқув йилида дастур 6–8-синф ўқувчиларига ҳам татбиқ этилади. Уларга қолдирилмаган ҳар бир ҳафта учун 50 доллардан тўланади.

Мактаб округи 1 миллиард 100 миллион долларлик умумий бюджетдан дарс қолдиришга қарши курашиш чора-тадбирларига жами 13 миллион 900 минг доллар ажратган. 

Асосий тўловлар анъанавий равишда январь-март ойларига тўғри келади, чунки бу даврда совуқ ҳаво ва мавсумий касалликлар сабабли давомат тушиб кетади. Шу билан бирга, қоидалар аввалгидагидек қолмоқда: душанбадан жумагача узрсиз сабаб билан қолдирилган ягона дарс ҳам жорий ҳафта учун тўловни тўлиқ бекор қилади.