Трамп Зеленскийни G20 саммитига таклиф қилишини айтди

АҚШ Президенти Дональд Трамп Украина Президенти Владимир Зеленскийни декабрь ойида Майамида бўлиб ўтадиган “Катта йигирматалик” (G20) саммитига таклиф қилишга қарши эмаслигини айтди. Бу ҳақда у кеча, 31 октябрь куни АҚШнинг Флорида штатидаги Мар-а-Лаго қароргоҳида ўтказилган Хэллоуин байрами тадбири вақтида журналистлар билан суҳбатда сўз очди.

Журналистлар Трампдан АҚШ Россия Президенти Владимир Путинни саммитга таклиф қилганини ҳисобга олиб, Зеленский ҳам тадбирга таклиф этиладими, деб сўраган.

“Таклиф қиламан. Ҳа, бунда ҳеч қандай муаммо йўқ”, деган АҚШ Президенти.

Аввалроқ, 31 октябрь куни АҚШ Давлат котиби Марко Рубио Зеленскийнинг саммитда иштирок этиши Трампнинг таклифига боғлиқлигини билдирганди. Ўшанда у бу борада ҳали якуний қарор қабул қилинмаганини айтган.

Маълумот учун, G20 саммити 14–15 декабрь кунлари Майами шаҳрида ўтказилиши режалаштирилган. АҚШ сентябрь ойида Россия Президенти Владимир Путинни ҳам саммитга таклиф қилган. Трамп ва Путин тадбир доирасида учрашиши мумкин.

Шундан сўнг Зеленский Путин билан саммит доирасида учрашув ўтказишни таклиф қилган, бироқ Россия Президенти бу таклифни рад этган. Трамп ҳам яқинда Путиннинг Майамида уч томонлама учрашув ўтказишга рози бўлиш-бўлмаслигини билмаслигини айтганди.

Шунингдек, Марко Рубио Трамп ва Путин бир неча ҳафта ичида учрашиши мумкинлигини маълум қилган. Учрашув 18–19 ноябрь кунлари Хитойда бўлиб ўтадиган Осиё-Тинч океани иқтисодий ҳамкорлиги (APEC) саммити доирасида ташкил этилиши мумкин.

Трамп яқинда Зеленский ва Путин билан учрашув ўтказиш режалари борлигини ҳам билдирган. Бироқ у учрашув санаси ва унинг уч томонлама ёки алоҳида шаклда ўтишига аниқлик киритмаган.

Эслатиб ўтамиз, аввалроқ Украина Президенти Владимир Зеленский Украина, АҚШ ва Россия ўртасидаги уч томонлама музокаралар ноябрь ойида ўтказилиши мумкинлигини маълум қилган эди. Шунингдек, Россия Президенти ёрдамчиси Юрий Ушаков Россия, АҚШ ва Украина ўртасида Россия-Украина урушини якунлаш бўйича тинчлик музокаралари жорий йилнинг 4 ноябридан кейин Абу-Дабида ўтказилиши кутилаётганини маълум қилганди.