Трамп ёнғинлар тутуни АҚШга ўтгани учун Канадага бож жорий қилмоқчи (видео)

АҚШ Президенти Дональд Трамп Канададаги ўрмон ёнғинлари тутуни АҚШ ҳудудига тарқалаётгани учун Оттавани айблаб, бу ифлосланишни бартараф этиш харажатлари Канада товарларига қўлланилаётган мавжуд тарифларга қўшилишини маълум қилди. Бу ҳақда “Reuters” хабар берди.

Қайд этилишича, 16-17 июлль кунлари Канадада юзлаб ўрмон ёнғинлари оқибатида ҳосил бўлган қалин тутун АҚШнинг Ўрта Ғарбидан Шимоли-шарқигача бўлган ҳудудларни қоплаган. Шу муносабат билан аҳолига уйдан чиқмаслик бўйича огоҳлантиришлар берилган.

Канада Бош вазири Марк Карни билан муносабатлари кескин бўлган Трамп Truth Social ижтимоий тармоғидаги саҳифасида Карнига қўнғироқ қилиб, бу “умуман қабул қилиб бўлмайдиган” вазият юзасидан қандай чора кўрилишини сўрашини айтган.

“Биз Канадани ўз ўрмонларини тўғри бошқармаётгани учун жавобгар деб ҳисоблаймиз. Шу сабабли АҚШ ҳудуди кераксиз равишда ифлосланган ва соғлиқ учун зарарли ҳаво билан қопланмоқда”, деган Трамп.

Унинг таъкидлашича, бу “қасддан қилинган бепарволик” бўлиб, ҳар йили такрорланмоқда ва АҚШга миллиардлаб доллар зарар келтирмоқда.

“Бу ифлосланишнинг ҳисоблаб бўлмайдиган харажатлари ҳозирда Канада товарларига қўлланилаётган тарифларга қўшилиши керак”, деган АҚШ Президенти.

Канаданинг Фавқулодда вазиятлар ва жамоалар барқарорлиги вазири Элеанор Ольшевски эса ҳукумат 2020 йилдан буён ўрмонларни муҳофаза қилиш ва ёнғинларнинг олдини олиш учун 12 миллиард Канада доллари сармоя киритганини билдирган. У, шунингдек, АҚШ ва Канада ўртасидаги ўрмон ёнғинларига қарши кураш бўйича кўп йиллик ҳамкорликни эслатган.

“Ҳозирги пайтда асосий устувор вазифамиз канадаликларни ҳимоя қилиш ва жамоалар хавфсизлигини таъминлашдир”, деган вазир.

Иқлим бўйича мутахассаслар глобал ҳароратнинг ошиши Канадада ўрмонларнинг қуришига ва сўнгги йилларда ёнғинлар сонининг кўпайишига олиб келганини таъкидламоқда.

“Иқлим исиши билан экстремал об-ҳаво ҳодисалари ва ёнғинлар сони янада ортиб боради”, деган Британия Колумбиясидаги Томпсон Риверс университети профессори Майк Фланниган.

Марк Карни идораси Трампнинг баёноти юзасидан ҳозирча изоҳ бермаган. Икки давлат раҳбарининг 20 июль куни Нью-Жерсида бўлиб ўтадиган футбол бўйича Жаҳон чемпионати финалида учрашиши кутилмоқда.

Жорий йилдаги ёнғинларнинг асосий қисми Онтарио вилоятининг аҳоли кам яшайдиган шимоли-ғарбий ҳудудларида кузатилмоқда. Ҳозирга қадар 650 минг акр (2 630 квадрат километр) ер майдони ёнган. Бу ўтган йилнинг шу давридаги 600 минг акр кўрсаткичидан юқори. Минглаб одамлар эвакуация қилинган.

Онтарионинг шимоли-ғарбида жойлашган “Collins First Nation” маҳаллий жамоаси ҳудуди ҳам ёнғиндан қаттиқ зарар кўрган. Жамоа вакиллари қайиқлар орқали эвакуация қилиниб, Thunder Bay шаҳрига жойлаштирилган.

“Ҳеч нарса қолмади. Аъзоларимиз қаттиқ изтиробда, саросимада ва ўзини йўқотган ҳолатда”, деган жамоа вакили Мэттью Ҳопп.

110 минг аҳоли яшайдиган Thunder Bay шаҳри мэри Кен Бошкоффнинг айтишича, шаҳар шимоли-ғарбий Онтариодан келган эвакуация қилинганларни қабул қилиш сабабли деярли тўлиқ тўлган. Онтарио Бош вазири Даг Форд эса вилоят тез тарқалаётган ёнғинларга қарши курашиш учун 11 та янги ҳаво кемасини сотиб олишини маълум қилган ва АҚШ сиёсатчилари томонидан билдирилган танқидларни рад этган.

Шу билан бирга, АҚШнинг ўзида ҳам 2026 йил ёнғинлар сони ўртача кўрсаткичдан юқори бўлмоқда. Миллий идоралараро ёнғин маркази маълумотига кўра, йил бошидан буён мамлакатда 3,7 миллион акр ер майдони ёнган. Сўнгги ўн йиллик ўртача кўрсаткич эса 2,7 миллион акрни ташкил этади.

Маълумот учун, Трамп 2025 йилда лавозимга киришгач, Канададан импорт қилинадиган бир қатор асосий товарларга тарифлар жорий этган эди.