Трамп Россия ва Украина муҳим масалада келишиб олганини эълон қилди

Россия ва Украина бир-бирининг энергетика инфратузилмасига зарба беришни тўхтатишга рози бўлди. Бу ҳақда бугун, 14 сентябрь куни АҚШ Президенти Дональд Трамп Truth Social ижтимоий тармоғидаги саҳифасида ёзди.

У ўзининг қисқа хабарида дизель ёнилғиси нархининг жаҳон миқёсида ошишини Қўшма Штатлар ва Эрон ўртасидаги можарога эмас, балки “кўпроқ” Россия ва Украина ўртасидаги урушга боғлаган.

Бир кун олдин Трамп “Irish Open” гольф турнирига ташрифи чоғида журналистлар билан мулоқотда Украина етакчиси Владимир Зеленскийни Россиянинг дизель инфратузилмасига зарба беришни тўхтатишга чақирган. 

“Биз бу ҳақда жаноб Зеленский билан гаплашдик. Жавоб бериш учун бошқа кўплаб нишонлар бор. Дизель ёнилғисига зарба берманг. Сиз Россиядаги дизель ёнилғисига зарба беришни тўхтатишингиз керак. Бу бутун дунёга зарар етказмоқда”, дейди у 13 сентябрь куни. 

Владимир Зеленский кейинроқ ўзининг Telegram-каналида агар “ҳамкорлар Россиянинг Украинанинг электр энергетика тизимига, бошқа энергетик объектларига, критик инфратузилмасига ва озиқ-овқат етказиб бериш занжирига зарба бермаслик ҳақидаги реал қарорини бажаришга тайёр бўлса, Киев Россия энергетикасига зарба беришдан тийилишга тайёрлигини ёзди. Шу билан бирга, у “Украина Россиянинг бирор бир келишувга амал қилишига ишонмайди”, деб қўшимча қилди.

Ўша постда у бу каби келишувларнинг узоқ муддатли бўлиши ва “одамлар ҳаёти учун реал таъсири” зарурлигини, шунингдек, улар “россияликлар ўз “сайловларини” ўтказиб олгач ҳамда бензин ва дизель бўйича босимни вақтинча сусайтириб олганларидан сўнг” барбод бўлмаслиги кераклигини қайд этган. 

“Урушни тугатиш керак. Критик инфратузилмага нисбатан деэскалация қадами эса тинчлик сари биринчи қадам бўлиши мумкин”, дейди Украина етакчиси.

Эслатиб ўтамиз, аввалроқ Россиянинг Украина бўйлаб амалга оширган ҳаво ҳужумларида камида 10 киши ҳалок бўлиб, ўнлаб одам яралангани ҳақида хабар берилган эди.