Трамп Нью-Мексико номини “Янги Америка”га ўзгартирмоқчи

АҚШ Президенти Дональд Трамп Нью-Мексико штати номини “Янги Америка” (New America) деб ўзгартириш ғоясини қўллаб-қувватлади. Бу ҳақда у кеча, 7 сентябрь – Меҳнат куни муносабати билан ижтимоий тармоқда штат харитасининг номи ўзгартирилган бир нечта вариантини жойлаш орқали маълум қилди.

Трамп 6 сентябрь куни штат номини ўзгартириш бўйича таклифлар олганини ва бу ғоя унга маъқул келганини айтган. У янги ном штат учун “анча нуфузли ва чиройли” бўлишини таъкидлаган.

АҚШ Президентининг бу ташаббуси Мексика билан савдо музокаралари кескинлашаётган бир пайтга тўғри келмоқда.

Трамп аввал ҳам географик номни ўзгартириш ташаббуси билан чиққан. Хусусан, Канада билан савдо музокараларидан натижа чиқмаганидан кейин ўтган ой Онтарио кўлини “Америка кўли” деб аташ ғоясини илгари сурганди.

Бироқ АҚШ федерал ҳукумати штат номини ўзгартириш ваколатига эга эмас.

Нью-Мексико штатига 2019 йил 1 январдан бери демократ Мишель Лухан Гришэм губернаторлик қилмоқда. У 2022 йилда қайта сайланган.

Губернатор Трампнинг таклифига муносабат билдириб, Нью-Мексико номи муҳокама учун мавзу эмаслигини айтган. У штат номи АҚШ ташкил топишидан ҳам аввал мавжуд бўлганини таъкидлаган.

Эслатиб ўтамиз, аввалроқ АҚШ Президенти Дональд Трамп Ҳормуз бўғозини “Трамп бўғози” деб қайта номлашни таклиф қилганди.