Тошкентда сувга тушиб кетган болани официант қутқариб қолди (видео)

Тошкент шаҳрининг Олмазор туманида коптокни олиш учун катта қувур устига чиқиб, сувга тушиб кетган бола қутқариб қолинди. Бу ҳақда Тошкент шаҳар Фавқулодда вазиятлар бош бошқармаси хабар берди.

Маълум қилинишича, воқеа жорий йил 23 сентябрь куни Олмазор туманидаги сув бўйида жойлашган маҳаллалардан бирида содир бўлган.

Қайд этилишича, болалар копток ўйнаётган вақтда тўп сувга тушиб кетган. Болалардан бири уни олиб чиқиш учун катта қувур устига чиққан, бироқ коптокни олаётган пайтда мувозанатини йўқотиб, сувга тушиб кетган.

Оқим болани узоқроққа олиб кетган. Шу пайтда сув бўйидаги кафелардан бирида ишлаётган официант йигит болани кўриб қолган ва сувга сакраб, уни қутқариб қолган.

Билдирилишича, қутқарувни амалга оширган официант йигит тақдирланиши кутилмоқда.

Эслатиб ўтамиз, аввалроқ Тошкент шаҳрининг Мирзо Улуғбек туманидан ўтувчи каналда оқиб кетаётган болакай фуқаро томонидан қутқариб қолингани ҳақида хабар берилган эди.