Тошкентда офисдан 880 млн сўм ўғирлаган шахс ушланди (видео)

Тошкент шаҳрининг Юнусобод туманидаги офисларнинг биридан 880 миллион сўмни ўғирлаб кетган шахс қўлга олинди. Бу ҳақда Тошкент шаҳар Ички ишлар бош бошқармаси хабар берди.

Маълум қилинишича, Юнусобод тумани Марказ-5 даҳасида яшовчи фуқаро офисдан номаълум шахс томонидан 880 миллион сўм ўғирлаб кетилгани юзасидан ички ишлар органларига мурожаат қилган.

Шундан сўнг, Юнусобод тумани ички ишлар органлари фаолиятини мувофиқлаштириш бошқармаси Жиноят қидирув бўлими ходимлари томонидан тезкор-қидирув тадбирлари ўтказилганда ушбу жиноятни содир этган шахс аниқланиб, қўлга олинган.

Гумонланувчининг хонадони тинтув қилинганда, ўғирланган пуллар ашёвий далил сифатида олиб қўйилган.

“Ушбу пулларни олиб, уйимда турган Foton юк машинасига қўйдим. Ўша ернинг ўзида мени ушлашди. Қилган ишимдан пушаймонман”, деган гумонланувчи.

Мазкур ҳолат юзасидан Жиноят кодексининг 169-моддаси (ўғирлик) билан жиноят иши қўзғатилган. Гумонланувчига нисбатан қамоққа олиш тарзидаги эҳтиёт чораси қўлланилган.

Эслатиб ўтамиз, аввалроқ Тошкентда онлайн қиморга пул тикиш мақсадида Spark русумли автомобилни ўғирлаган шахс ушланган эди.