Тошкентда 1,2 километрлик BRT йўли фойдаланиш учун очилди (видео)

Тошкент шаҳрининг Шаҳрисабз кўчасида BRT йўлагининг биринчи босқичи фойдаланишга топширилди. Бу ҳақда Тошкент шаҳрида Йўл ҳаракатини ташкил этиш маркази хабар берди.

Қайд этилишича, лойиҳанинг биринчи босқичи Шаҳрисабз, Миробод ва Шота Руставели кўчалари туташган айланма чорраҳадан Амир Темур шоҳ кўчаси билан кесишмагача бўлган 1,2 километрлик ҳудудни қамраб олган.

Қурилиш жараёнида йўлнинг фақат асфальт қопламаси янгиланмасдан, унинг остки конструкцияси ҳам тўлиқ қайта қурилган. Айрим жойларда 2 метрдан ортиқ чуқурликда қазиш ишлари амалга оширилиб, йўл пойдевори қайта шакллантирилган.

Грунт намлиги, тупроқ силжиши ва кейинчалик чўкиш хавфини камайтириш учун геотекстил қопламаси ётқизилган. Кейин йўл асоси 35 сантиметрлик қум-шаг‘ал аралашмаси, М-75 маркали мустаҳкамловчи қатлам, 9 сантиметрлик йирик донали асфальт-бетон ва 5 сантиметрлик ПШМА-20 қопламаси билан мустаҳкамланган.

Янги BRT инфратузилмаси доирасида 5 та автобус бекати ташкил этилган. Автобуслар учун алоҳида ҳаракат йўлаги шакллантирилиб, у умумий транспорт оқимидан бордюрлар орқали ажратилган.

Маълум қилинишича, қурилиш ишлари давомида транспорт ҳаракати тўлиқ тўхтатилмаган. Ишлар йўлнинг марказий тасмаларида босқичма-босқич бажарилиб, четки ўнг тасмаларда ҳаракат сақлаб қолинган.

Шаҳрисабз кўчасидаги 1,2 километрлик қисм BRT лойиҳасининг биринчи босқичи ҳисобланади. Умумий лойиҳа доирасида кўчанинг қарийб 3 километрлик қисмида BRT йўлагини ташкил этиш режалаштирилган.

Эслатиб ўтамиз, аввалроқ Тошкент шаҳрининг Миробод туманидаги Шаҳрисабз кўчасида BRT (тезкор автобус транспорти) йўлагини ташкил этиш ишлари бошлангани ҳақида хабар берилган эди.