Токио-2020: Зайнаб Дайибекова чорак финалда имкониятни бой берди

Қиличбозликнинг сабля йўналишида Ўзбекистон шарафини ҳимоя қилаётган Зайнаб Дайибекова венгриялик Анна Мартонга қарши супачага чиқди ва 11:15 ҳисобида мағлубиятга учради.

Бу баҳсга қадар Дайибекова нимчорак финалда жанубий кореялик Жиcу Йон билан рўбарў келган ва баҳсни устунлик билан ўтказиб, 15:12 ҳисобида ғалаба қозонганди.

Иккинчи даврада эса қорақалпоғистонлик спортчига Осиё ўйинлари финалчиси хитойлик Яци Шао рақиблик қилди. Дайибекова ушбу беллашувни ҳам кўнгилдагидек ўтказиб, 15:10 ҳисобида рақибидан устун келди. Зайнаб Дайибекова рейтингда 35, Шао эса 3-рақамда сараланган эди.

Дастлабки босқичда эса, мезбон мамлакат — Япония вакили Чика Аокига қарши кечган жангда 15:9 ҳисобидаги ғалаба эвазига ўзбек спортчиларининг бугунги иштирокини муваффақиятли бошлаб берган эди.

Аввалроқ, таэквондочи Никита Рафалович Олимпиаданинг ярим финалига йўл олгани ҳақида хабар берган эдик.