“Тирик қолишимга умид қиламан”. Надеждин сайловолди кампаниясини тўхтатди

Россиялик сиёсатчи Борис Надеждин Давлат думаси сайловига қаратилган сайловолди кампаниясини тўхтатганини эълон қилди. Унинг айтишича, “юзлаб имзолар” тўпланган бўлса-да, улар сайлов комиссиясига топширилмайди. Бу ҳақда “Forbes” хабар берди.

Қайд этилишича, Надеждин бу қарорини ўзини қўллаб-қувватлаётганларни хавф остида қолдиришни истамаслиги билан изоҳлаган. Сиёсатчининг айтишича, унга қарши турли давлат идоралари томонидан босим ўтказилмоқда.

“Менга қўлидан келган ҳар ким ҳужум қилди: Адлия вазирлиги мени хорижий агент деб эълон қилди, Ички ишлар вазирлиги ва суд мени экстремизм тарғиботчиси деб топди, Суд ижрочилари федерал хизмати хорижга чиқишимни тақиқлади, Омонатларни суғурталаш агентлиги ва арбитраж суди эса мени банкрот деб топди”, дейди у.

Надеждиннинг сўзларига кўра, “хорижий агент” мақомининг берилиши ҳамда экстремизмга оид модда бўйича айбдор деб топилиши амалда унинг Давлат думасига сайланиш имкониятини қонунан истисно қилади. Шу билан бирга, у Россияда қонуний асосда мухолифат сиёсати билан шуғулланиш имкониятини фақат вақтинча йўқотганига умид билдирган.

Надеждиннинг айтишича, сайлов ҳисобига тушган маблағлар имзо тўпловчилар ва сайлов штаблари ходимлари билан ҳисоб-китоб қилишга сарфланади.

“Энди қандай яшашим ҳақида ўйлаб кўришим керак. Тирик ва озод қолишимга умид қиламан”, деган сиёсатчи.

Маълумот учун, Россия Адлия вазирлиги 10 июль куни Надеждинни “хорижий агент”лар рўйхатига киритган. Бир неча кун ўтгач, у полиция томонидан олиб кетилганини маълум қилган. Кейинчалик, суд уни экстремистик ташкилот рамзларини намойиш этганликда айбдор деб топиб, 1 минг рубль жарима тайинлади.

Сиёсатчининг адвокати Дмитрий Труниннинг билдиришича, иш Алексей Навальний иштирок этган видеога ҳавола Надеждиннинг ижтимоий тармоқларида жойлаштирилгани билан боғлиқ.

16 июль куни эса Надеждин унга хорижга чиқиш тақиқлангани ҳақида қарор берилганини маълум қилди ва бу қарор устидан шикоят қилишини айтди. ТАСС маълумотига кўра, суд ижрочилари ундан қарийб 1,5 миллион рубль қарз ундириш ишларини олиб бормоқда.

Эслатиб ўтамиз, Надеждин 2024 йилда ҳам Россия президентлигига номзод бўлишга уринган эди. Бироқ Марказий сайлов комиссияси унинг номзодини қўллаб-қувватлаш учун йиғилган имзоларнинг 15 фоиздан ортиғи ҳақиқий эмас деб топиб, уни рўйхатдан ўтказишни рад этган. Кейинчалик Россия Олий суди мазкур қарорни қонуний деб топган.