“Свет”дан қарздорликни камайтириб беришни ваъда қилган шахс ушланди

Андижонда фуқаронинг савдо дўконидаги электр энергиясидан ноқонуний фойдаланиши сабаб юзага келган 400 млн сўмлик қарздорлигини танишлари орқали камайтириб беришни ваъда қилган шахс 3 минг доллар олаётганда ушланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.

Қайд этилишича, департаментнинг Олтинкўл тумани бўлими ва бошқа ҳуқуқни муҳофаза қилувчи органлар ходимлари ҳамкорлигида тезкор тадбир ўтказилган. Унда фуқаро М.А. фуқаро Қ.М. нинг савдо дўконида электр энергиясидан ноқонуний фойдаланиш ҳолати юзасидан вужудга келган 400 млн сўмлик қарздорликни “Ҳудудий электр таъминоти” АЖ Андижон вилояти филиалида ишловчи танишлари орқали камайтириб беришини айтиб, бунинг эвазига 3 минг АҚШ долларини олган вақтида ушланган.

Билдирилишича, мазкур ҳолат юзасидан Жиноят кодексининг 168-моддаси (фирибгарлик) ҳамда 28, 211-моддалари (пора бериш) билан жиноят иши қўзғатилган. Ҳозирда тергов ҳаракатлари олиб борилмоқда.

Эслатиб ўтамиз, аввалроқ Хоразм вилояти Қўшкўпир тумани қурилиш ва уй-жой коммунал хўжалиги бўлими бошлиғи фуқаронинг нотурар биносини тураржой тоифасига ўтказиб беришни ваъда қилиб, 1 000 АҚШ доллари талаб қилган ва пулнинг бир қисмини олган вақтида ушлангани ҳақида хабар берилган эди.