SOCAR Италияда бензин нархига чеклов қўймоқчи. Мелони Алиевга раҳмат айтди

Озарбайжоннинг SOCAR компанияси назоратида бўлган “Italiana Petroli” Италиянинг бутун ҳудудида бензин ва дизель нархларига чеклов жорий этишни бошлайди. Бу ҳақда ANSA хабар берди.

Қайд этилишича, Озарбайжоннинг SOCAR компаниясига тегишли “Italiana Petroli” (IP) Италия бўйича ёқилғи нархларини чеклаш тўғрисида қарор қабул қилган ва бу қадам Бош вазир Жоржия Мелони томонидан ижобий кутиб олинган.

Мелонининг айтишича, IP’нинг қарори Италиядаги оилаларни қўллаб-қувватлаш нуқтаи назаридан муҳим қадам ва ёнилғи нархлари ошишининг олдини олишга реал ҳисса қўша олади.

“Шу муносабат билан Озарбайжон Президенти Илҳом Алиевга эътибори ва қўллаб-қувватлагани учун миннатдорлик билдирмоқчиман. Бу қадам мамлакатларимиз ўртасидаги ҳамкорликни мустаҳкамлайди”, дейди Мелони.

SOCAR баёнотига кўра, ёнилғи нархларига чеклов жорий этиш босқичма-босқич амалга оширилади ва биринчи босқичда IP бренди остида фаолият юритаётган ёнилғи қуйиш шохобчаларини қамраб олади.

Компаниянинг маълум қилишича, бензин ва дизель сотув нархлари бўйича белгиланадиган чеклов турли омилларни ҳисобга олган ҳолда шакллантирилади. Мақсад – ёнилғи билан таъминлаш занжири барқарорлигини сақлаб қолиш билан бирга, Италияда оилалар ва бизнеснинг юқори ёнилғи нархларидан азият чекишини камайтиришдир.

Маълумот учун, SOCAR май ойида “Italiana Petroli” компаниясини сотиб олишни якунлаган. Бу билан Озарбайжон энергетика компанияси Италиянинг ёнилғи чакана савдо бозоридаги кенг тармоқни назорат қилишни бошлаган.

Италия ҳукумати сўнгги ойларда мамлакатда ёнилғи нархларининг ошиши фонида энергетика компанияларини нархларни чеклаш йўналишида қадамлар ташлашга чақирган. IP’нинг қарори ҳам ушбу жараён доирасида қабул қилинган.