Соболенко ва Жокович “US Open” мусобақасида жуфтликда ўйнайди

Дунёнинг 1-рақамли теннисчиси, беларуслик Арина Соболенко ҳамда собиқ жаҳоннинг 1-рақамли теннисчиси, 24 карра “Катта дубулға” ғолиби сербиялик Новак Жокович “US Open” мусобақасида аралаш жуфтлик баҳсларида бирга ўйнайди. Бу ҳақда турнир матбуот хизмати хабар берди.

Спортчилар мусобақанинг асосий тўрида иштирок этади. 28 ёшли Соболенко 2024 йил октябрь ойидан буён WTA рейтингида етакчилик қилиб келмоқда. Беларуслик теннисчи фаолияти давомида 24 та WTA турнирида яккалик баҳсларида чемпионликни қўлга киритган.

Соболенко тўрт марта “Катта дубулға” турнирларида ғолиб бўлган. У Австралия Очиқ чемпионатида 2023 ва 2024 йилларда, АҚШ Очиқ чемпионатида эса 2024 ва 2025 йилларда чемпионликни қўлга киритган. Жуфтлик баҳсларида ҳам муваффақиятга эришган Соболенко 2019 йилда “US Open”, 2021 йилда эса “Australian Open” турнирида ғолиб чиққан.

39 ёшли Новак Жокович айни вақтда ATP рейтингида 5-ўринни эгаллаб турибди. Сербиялик теннисчи фаолияти давомида 101 та ATP турнирида чемпион бўлган. Унинг 24 та “Катта дубулға”даги ғалабаси эркаклар ўртасидаги яккалик баҳсларида рекорд ҳисобланади.

Жокович 2024 йил Париж Олимпиадасида олтин медалга, 2008 йил Пекин Олимпиадасида бронза медалига сазовор бўлган. Шунингдек, у 2010 йилда Сербия терма жамоаси билан Дэвис кубогида ғолиб чиққан.

Сербиялик теннисчи дунёнинг биринчи рақамли теннисчиси мақомида энг кўп – 428 ҳафта бўлгани билан ҳам рекордчи ҳисобланади.

Маълумот учун, “US Open” мавсумдаги тўртинчи ва сўнгги “Катта дубулға” турнири ҳисобланади. 2026 йилги мусобақа 30 августдан 13 сентябрга қадар Нью-Йоркда ўтказилади. Турнирнинг умумий соврин жамғармаси 90 миллион долларни ташкил этади.