“Шунча бўлурми ҳай-ҳай”. Алиев Эрдўғаннинг ашаддий мухолифатчиси билан қўнғироқлашди

Туркия Президенти Ражаб Тойиб Эрдўған Қорабоғга ташрифини якунлагач, Озарбайжон Президенти Илҳом Алиев Эрдўғанга мухолиф бўлган сиёсатчи –  “Янги партия” раиси Ўзгур Ўзел билан телефон орқали мулоқот қилди. Бу ҳақда Президентнинг ижтимоий тармоқлардаги саҳифасида хабар берилди.

Гап шундаки, сўнгги вақтларда Туркия ва Озарбайжон ўртасида кескинлашган ва инқироз ёқасига келгани тахмин қилинаётган муносабатлар фонида 8 ноябрь куни Туркия Президенти Ражаб Тойиб Эрдўған рафиқаси ҳамроҳлигида Озарбайжонга борди. Шу куни мамлакатда иккинчи Қорабоғ урушида эришилган Ғалабанинг 6 йиллиги нишонланди. Эрдўған ва Алиев оилалари қатор расмий тадбирлар, хотира маросимлари ва тантаналарда иштирок этди. Икки мамлакат раҳбарлари матбуот учун баёнот бериб, Туркия ва Озарбайжон муносабатлари ҳамиша яхши бўлгани ва бундан кейин ҳам шундай давом этишини билдирди. 

Эрдўған Озарбайжонни тарк этгач, Туркияда амалдаги Ҳукуматнинг ашаддий мухолифи бўлган “Янги партия” раиси Ўзгур Ўзел Озарбайжон Президенти Илҳом Алиевга қўнғироқ қилган. Телефон мулоқотидан мақсад Алиевни Қорабоғда эришилган ғалабага 6 йил тўлиши муносабати билан табриклаш экани айтилмоқда. 

“Телефон орқали мулоқот чоғида Озарбайжон-Туркия давлатлари ва халқлари ўртасидаги дўстлик, қардошлик муносабатлари бузилмас экани яна бир бор таъкидланди”, дейилади Озарбайжон Президентининг X ижтимоий тармоғидаги саҳифасида. 

Озарбайжонлик сиёчсатчи Элхон Шоҳинўғли Ўзгур Ўзелнинг Алиев билан телефон суҳбатини баҳоларкан, бу мулоқот Эрдўғаннинг манфаатларига ҳам мос эканини айтди. 

“Ўзгур Ўзелнинг Илҳом Алиев билан телефон орқали мулоқоти муносабатлардаги сўнгги инқироз билан боғлиқ, деб ўйламайман. Ўзгур Ўзел 2024 йил 8 ноябрь куни ҳам Илҳом Алиевга қўнғироқ қилиб, давлат раҳбарини Озарбайжоннинг ҳудудий яхлитлиги тиклангани, шунингдек, 44 кунлик Ватан урушидаги ғалабанинг тўрт йиллиги билан табриклаганди. Ўзгур Ўзел икки йил олдинги телефон суҳбатида Отатуркнинг “Озарбайжоннинг қайғуси – бизнинг қайғумиз, унинг қувончи – бизнинг қувончимиз” деган сўзларини эслатиб ўтди”, дейди сиёсатчи. 

Элхон Шоҳинўғлига кўра, ҳозирда Ўзел раҳбарлик қилаётган “Янги партия” турк жамиятида катта қўллаб-қувватловга эга. Икки йилдан сўнг Туркияда президентлик сайловлари бўлиб ўтади. “Янги партия”ни қўллаб-қувватлайдиган номзоднинг давлат раҳбари этиб сайланиш эҳтимоли эса кам эмас. 

“Шу нуқтаи назардан, ушбу партия билан мулоқот Озарбайжон-Туркия иттифоқини мустаҳкамлашга хизмат қилади. Яқин келажакда Ражаб Тойиб Эрдўғаннинг иттифоқчиси, “Миллатчи ҳаракат партияси” раҳбари Давлат Боғчали Озарбайжонга ташриф буюриши мумкин. Туркия “Миллатчи ҳаракат партияси”, сиёсатчилари ва экспертлари Озарбайжон билан муносабатларга қаратаётган аҳамият икки давлат ўртасида юзага келаётган инқирозларни бартараф этишда алоҳида роль ўйнайди”, дея қўшимча қилди у.

Маълумот учун, Ўзгур Ўзел – Эрдўғанга бош сиёсий рақиб ва мухолифат етакчисидир. Эрдўған "Адолат ва тараққиёт партияси" раҳбари сифатида ҳокимиятда турган бўлса, Ўзгур Ўзел унинг ички ва ташқи сиёсатини, иқтисодий қарорларини фаол танқид қилувчи асосий мухолиф кучнинг раҳбаридир.

Инқироз ва араз 

Жорий йилнинг октябрь ойида Озарбайжондаги мактабларда рўмол билан боғлиқ можаролар чиқди. Рўмолли ўқувчи-қизларнинг мактаб, университетларга киритилмаётгани, ўқитувчиларнинг ишдан четлаштирилиши ижтимоий тармоқларда катта баҳсларга сабаб бўлди. Ушбу воқеалар ортидан туркиялик бир қатор сиёсатчилар, жамоатчилик вакиллари, журналистлар Озарбайжон раҳбариятига нисбатан кескин баёнотлар билан чиқди. Озарбайжон Президенти Илҳом Алиев ҳам ўз нутқида Қорабоғ урушида Озарбайжоннинг ёнида туриб, унга ёрдам бермаганларнинг Бакунинг ички ишларига аралашишга ҳаққи йўқлигини айтди. Алиев ўз сўзида муайян бир давлат номини тилга олмаган бўлса-да, кўпчилик бу гаплар Туркия аталганини тахмин қилди. Кун сайин авж олган инқирозли вазият фонида Озарбайжон туркиялик 31 кишини мамлакатда исталмаган шахслар рўйхатига киритди, Алиев 29-30 октябрь куни Анқарада ўтадиган Туркий давлатлар ташкилотининг навбатдаги саммитида иштирок этишдан бош тортди. Эрдўғаннинг ўзи қўнғироқ қилса-да, у саммитга келмади, ўрнига Ташқи ишлар вазири Жайҳун Байрамовни юборди. 

Туркия Президенти Эрдўғаннинг маслаҳатчиси Оқтой Сарал ҳам Озарбайжоннинг мактаб формаси сиёсатини танқид қилганидан кейин лавозимидан четлатилди. Бу қарор Анқара Баку билан муносабатларни кескинлаштиришдан кўра, уларни юмшатишга интилаётганини кўрсатди. Буни ҳам кам деб билган Эрдўған, 8 ноябрь куни рафиқаси билан Қорабоғга борди.