“Шафқатсизлик”. Жанубий Корея Президенти Зеленскийни танқид қилди

Жанубий Корея Президенти Ли Чжэ Мён Шимолий Корея (КХДР) ҳарбий асирларининг топширилиши ҳақида ошкора гапирган Украина Президенти Владимир Зеленскийни танқид қилди. Бу ҳақда “Yonhap” хабар берди.

Нашрнинг ёзишича, Жанубий Корея Президенти Ли Чжэ Мён Нью-Йоркда бўлиб ўтган БМТ Бош Ассамблеяси чоғида Украина яқинда икки нафар шимолий кореялик аскарни Жанубий Кореяга юборганини маълум қилган Украина Президенти Владимир Зеленский шаънига танқидий мулоҳазалар билдирган.

Зеленский маъмурияти икки нафар шимолий кореялик маҳбуснинг Жанубий Кореяга топширилиши Сеул билан тўғридан тўғри мулоқот доирасида амалга оширилганини тасдиқлаган. Ли Чжэ Мён эса ушбу масала жуда нозик эканини ҳамда дипломатия ва миллий хавфсизликка, шунингдек, Корея ярим оролидаги вазиятга улкан таъсир кўрсатиши мумкинлигини қайд этган.

“Украина маълумотларни ошкор қилмаслик тўғрисидаги келишувни бузган ҳолда маълум қилди. Маълумотлар ошкор этилиши сабабларини билмайман, аммо бундан афсусдаман”, дейди у.

Унинг сўзларига кўра, маълумотлар ошкор қилинган тақдирда юзага келиши мумкин бўлган кўплаб муаммоларни ҳисобга олган ҳолда, Жанубий Корея ва Украина шимолий кореялик аскарларни махфий тарзда топширишга келишиб олган.

Шу билан бирга, Жанубий Кореядаги мухолиф партиялар ушбу келишувни махфий тутиш қарорини танқид қилган. Ли Чжэ Мён эса ўз навбатида бундай нозик келишув тафсилотларини ошкора эълон қилиш шафқатсизлик ва масъулиятсизлик бўлишини айтган.

Эслатиб ўтамиз, 2025 йилнинг январь ойида Россиянинг Курск вилоятида икки нафар шимолий кореялик аскар Украина кучлари томонидан асирга олингани маълум бўлган эди.