Саудия лигасидан икки футболчи “Олтин тўп”га номзодлар рўйхатига кирди – журналист

Саудия Арабистонининг “Ал-Наср” жамоаси ҳужумчиси Садио Мане ва “Ал-Қодисия”нинг мексикалик форварди Хулиан Киньонес “France Football” нашри томонидан 2026 йилги “Олтин тўп” мукофотига даъвогарларнинг энг яхши 30 талигидан жой олади. Бу ҳақда журналист ва инсайдер Бен Жейкобснинг ижтимоий тармоқларда маълум қилди.

Манбага кўра, ҳар икки футболчининг ўтган мавсумдаги ўйинлари, жумладан, Саудия Арабистони Про-лигаси ва 2026 йилги Жаҳон чемпионатидаги иштироки юқори баҳоланган.

Шунингдек, якуний қисқа рўйхатдан ПСЖнинг 10 нафар футболчиси ўрин олиши кутилмоқда. Бу бир клуб вакили сифатида энг юқори кўрсаткич бўлади. Эслатиб ўтамиз, парижликлар 2025-2026 йилги Чемпионлар лигасида ғолиб бўлган.

Ўтган мавсумда 34 ёшли Мане клуб ва терма жамоа сафида 55 та учрашувда майдонга тушиб, 24 та гол урди ва 12 та голли узатмани амалга оширди. Сенегаллик футболчи “Ал-Наср” билан Саудия Арабистони чемпионлигини қўлга киритди. Шунингдек, у Сенегал терма жамоаси билан Африка Миллатлар кубогида ғолиб чиқди.

29 ёшли Киньонес эса ўтган мавсумда Саудия Арабистони Про-лигасининг энг яхши тўпурари бўлди – у чемпионатда 33 та гол урди. 

Мексикалик футболчи клуб ва миллий терма жамоа сафида барча мусобақаларда 46 та ўйин ўтказиб, 41 та гол ва 5 та голли узатма қайд этди.

Мексика терма жамоаси эса 2026 йилги Жаҳон чемпионатида 1/8 финалга қадар етиб борди.