Рубио истеъфоси ҳақидаги хабарларга аниқлик киритди

АҚШ Давлат котиби Марко Рубио Президент Дональд Трамп маъмуриятидан кетиш ёки 2028 йилги президентлик сайловларида номзодини қўйиш режалари борлиги ҳақидаги хабарларни рад этди. У Трамп билан ишлаш ҳар доим унинг режаси бўлганини айтди. Бу ҳақда у “The New York Times” нашрига берган интервьюсида маълум қилди.

“Ростини айтсам, бу миш-мишлар қаердан пайдо бўлаётганини билмайман. Мен қилаётган ишимдан мамнунман. Ишдан кетишим ҳақида гапиришганида доим куламан. Мен эса: “Қайси ишдан?“ деб сўрайман”, деган Рубио истеъфога чиқиши ҳақидаги хабарларга изоҳ бераркан.

Шунингдек, у 2028 йилда АҚШ президентлигига ўз номзодини қўйиш-қўймаслиги ҳақидаги саволга жавоб беришдан бош тортган.

“Мен 2028 йил ҳақида бошқа гапирмайман. Шунчаки гапирмайман”, деган у.

АҚШда навбатдаги президентлик сайловлари 2028 йил 7 ноябрга белгиланган.

Эслатиб ўтамиз, аввалроқ “The Sun” нашри АҚШнинг Ҳиндистондаги элчиси Серджио Гор Давлат котиби Марко Рубио ўрнини эгаллаши мумкинлиги ҳақида ёзган эди. Нашрнинг қайд этишича, АҚШ Президенти Дональд Трамп атрофидагилар уни бир нечта юқори лавозимларга, жумладан, Давлат котиби лавозимига номзод сифатида кўриб чиқмоқда.