Россиядаги ЙТҲда икки ўзбекистонлик ҳалок бўлди

Россияда содир бўлган йўл-транспорт ҳодисаси оқибатида икки нафар ўзбекистонлик ҳалок бўлди. Бу ҳақда Ўзбекистон Республикасининг Қозон шаҳридаги Бош консулхонаси хабар берди.

Қайд этилишича, жорий йилнинг 6 август куни Россиянинг Мордовия Республикаси ҳудудида – Лямбир туманидаги Блохино қишлоғи яқинида М-5 “Урал” автомагистралининг 180 километрида “МАЗ” русумли юк автомашинаси билан Ўзбекистон Республикаси давлат рақами билан ҳаракатланаётган Spark енгил автомашина ўртасида йўл-транспорт ҳодисаси содир бўлган.

Ушбу ЙТҲ оқибатида Ўзбекистоннинг 2 нафар фуқароси (1996 йилда туғилган А.П., 1997 йилда туғилган Б.А.) ҳалок бўлган, яна 3 нафар ўзбекистонлик (2002 йилда туғилган А.П., 1989 йилда туғилган Б.А., 2006 йилда туғилган А.П.) турли хил тан жароҳатлари билан Мордовиянинг Марказий клиник шифохонасига жойлаштирилган.

Билдирилишича, мазкур ҳолат Бош консулхона томонидан назоратга олиниб, маҳаллий масъул ваколатли органлар билан алоқа ўрнатилган ва ҳозирда вафот этган фуқароларнинг жасадларини (суд-тиббий экспертиза ва бошқа жараёнлардан сўнг) қайтариш ишлари амалга оширилмоқда. Шунингдек, шифокорлар томонидан жабрланганларга зарур тиббий муолажалар кўрсатилиб, шифохонадан чиқарилган.

Эслатиб ўтамиз, аввалроқ Туркиянинг Бурса вилоятида ўзбекистонлик 36 ёшли Ойбек Ниёзов тўсатдан вафот этгани ҳақида хабар берилган эди. Кейинроқ, унинг жасади мамлакатга олиб келинди.