Россияда 3 яшар боланинг бошига бўйидан баланд муз бўлаги тушиб кетди (видео)

Россия Федерациясида кўп қаватли уй томидан уч ёшли боланинг бошига муз бўлаги қулаб тушди. Бу ҳақда Свердловск вилоят прокуратураси хабар берди.

Қайд этилишича, ҳолат кеча, 15 март куни Свердловск вилоятининг маъмурий маркази Екатеринбург шаҳрида содир бўлган. Унда 3 яшар боланнинг бошига бўйидан баланд муз бўлаги тушиб кетган. Бола ҳушини йўқотган. Воқеага бевосита гувоҳ бўлганлар унга биринчи ёрдам кўрсатган.

“Бола уйи ёнида ўйнаб юрган вақтда бинониг юқори қаватидан катта муз бўлаги тушиб унга зарар етказган. Ҳодиса оқибатида бола ҳушини йўқоиб, тиббий ёрдам кўрсатиш учун соғлиқни сақлаш муассасасига етказилди”, дейилади хабарда.

Прокуратура тозалаш ва турар-жой биносини назорат қилиш учун масъул бўлган ходимнинг иши ўрганиб чиқилишини ва шифокорлардан боланинг соғлиғига етказилган зарарнинг оғирлигини аниқлаш учун ҳужжатлар тақдим этилиши кутилаётганини маълум қилган.  Шифокорларнинг фикрича, бола ёпиқ мия жароҳати олган.

Эслатиб ўтамиз, февраль ойи ўрталарида Фавқулодда вазиятлар вазирлиги ўзбекистонликларни қорлар эриши ва томлардан сумалакларнинг тушиши билан боғлиқ бахтсиз ҳодисаларнинг олдини олиш учун эҳтиёт бўлишга чақирган эди.