Россия Япония – АҚШ машғулотларидан хавотирда – Захарова

Россия АҚШ билан бўлажак ҳарбий машғулотлар муносабати билан Японияга эътироз билдирди. Бу ҳақда бугун, 1 сентябрь куни Россия Ташқи ишлар вазирлиги расмий вакили Мария Захарова Шарқий иқтисодий форум доирасидаги брифингда маълум қилди.

Захарованинг сўзларига кўра, Япониянинг Россиядаги элчихонасига АҚШ билан бўлажак ҳарбий машғулотлар юзасидан хавотирлар баён этилган эътироз тақдим этилган.

“31 август куни Япониянинг Россиядаги элчихонасига ушбу манёврлар бўйича хавотирлар баён этилган эътироз билдирилди. Япония томонига мамлакатимизнинг шарқий чегаралари яқинида гиж-гижловчи ҳарбий фаолликка мутлақо йўл қўйиб бўлмаслиги қатъий кўрсатиб ўтилди”, дейди Захарова.

Эслатиб ўтамиз, аввалроқ Россия Президенти Владимир Путин илк бор Куриль оралларига ташриф буюриб, Токионинг кескин реакциясига сабаб бўлган эди. Япония томони қатъий норозилик билдириб, бу мамлакат халқининг туйғуларини ҳақоратлаш экани айтилганди.

Шунингдек, мамлакат Бош вазири Санаэ Такаичи Токио “Шимолий ҳудудлар” деб атайдиган Жанубий Куриль ораллари – Кунашир, Шикотан, Итуруп ва Хабомаи “Япониянинг азалий ҳудуди” эканини таъкидлаган.

Такаичининг аниқлик киритишича, япон томонининг позициясига кўра, ороллар “ҳам тарихий нуқтаи назардан, ҳам халқаро ҳуқуққа мувофиқ Япониянинг азалий ҳудуди” ҳисобланади.

Кўп ўтмай Россия ТИВ расмий вакили Мария Захарова жавоб баёноти билан чиқди. Унинг фикрича, Санаэ Такаичининг Владимир Путиннинг Итуруп оролига ташрифига оид билдирган фикрлари “ҳаддан ташқари ғазаб уйғотади ва мутлақо қабул қилиниши мумкин эмас”. Захарова барча Куриль ораллари “Россиянинг ажралмас қисми” эканини билдирган.