Россия дрони Херсонда сабзавот сотувчисини “овлади“ (видео)

Россия дрони кеча, 4 август куни Украинанинг Херсон шаҳрида кўча бўйида сабзавот сотаётган эркакни таъқиб қилиб, унга зарба берди. Воқеа акс этган видео эълон қилинганидан сўнг Украина Москванинг ҳаракатларини уруш жинояти деб баҳолади. Бу ҳақда “Reuters” хабар берди.

Украина полицияси томонидан эълон қилинган видеода дрон кўча бўйида савдо қилаётган эркакни микроавтобус атрофида қувиб юргани, у транспорт воситаси ортига яширинишга уринган пайтда эса портлагани акс этган. Полиция маълумотига кўра, 52 ёшли сотувчи эркак омон қолган, бироқ мия чайқалиши ва кичик жароҳатлар олган.

Кейинчалик жабрланувчининг исми Юрий экани маълум қилинган. Херсон вилояти ҳарбий маъмурияти раҳбари Александр Прокудин унинг шифохонадаги видеомурожаатини ҳам эълон қилган.

Украина Президенти Владимир Зеленский эса ушбу видеога муносабат билдириб, Россия Херсонда тинч аҳолига қарши “дрон сафари” уюштираётганини айтган.

“Бугун кўпчилик россияликлар Херсондаги тинч аҳолига қарши амалга ошираётган навбатдаги “дрон сафари” акс этган видеодан даҳшатга тушди. Россия ақлдан озган. Биз Россияни дронлар сонини кўпайтириш эмас, тинчлик ҳақида жиддий ўйлашга мажбур қиладиган тарзда ҳаракат қилишимиз ва ҳаётни қўллаб-қувватлашимиз керак”, деб ёзган Зеленский X ижтимоий тармоғида.

Александр Прокудиннинг айтишича, Юрий ўша куни эрталаб бозорга сабзавот сотиш учун келган.

“Эндигина соябонни ўрнатиб, қутиларни тушира бошлагандим. Хотиним ҳам ёнимда эди. Шунда ғувиллаган овозни эшитдик, аммо дронни кўра олмадик. У бозор ортидаги буталар томондан жуда пастлаб учиб келди. Бу ер очиқ дашт, қочадиган жой йўқ. Жуда қўрқинчли эди. Ҳақиқатан ҳам жуда қўрқинчли”, деган Юрий.

Видеода у иккала оёғи ва орқа қисмидаги жароҳатларини кўрсатган. Унинг айтишича, турмуш ўртоғи қочишга улгурган ва жароҳатланмаган.

Украина Ташқи ишлар вазири Андрей Сибига ушбу ҳужум Россиянинг тинч аҳолини қўрқитишга қаратилган атайлаб олиб бораётган кампаниясининг бир қисми эканини айтган.

“Херсондаги бу ваҳшийона Россия уруш жинояти халқаро ҳамжамият томонидан қораланиши ва адолат қарор топиши керак. Бироқ бунга ўхшаш минглаб жиноятлар жамоатчилик эътиборидан четда қолмоқда”, деб ёзган у Telegram'да.

Эслатиб ўтамиз, аввалроқ Украина Қора денгизда Россиянинг Новороссийск портига йўл олган Туркиянинг юк кемасига ҳужум уюштирган эди.