Роналду отасидан айрилган Мессига ҳамдардлик билдирди

Футбол бўйича Португалия терма жамоаси сардори ва ҳужумчиси Криштиану Роналду отаси Хорхе Мессидан айрилган аргентиналик юлдуз Лионель Мессига ўз ҳамдардлигини билдирди.

Хорхе Месси жорий йилнинг 7 август куни маҳаллий вақт билан соат 22:00 да Росарио шифохонасида ҳаётдан кўз юмганди. У 68 ёшда эди. Дафн маросими 9 август куни ёпиқ форматда бўлиб ўтди. ОАВ Жаҳон чемпионати вақтида Мессининг отаси оғир хаста экани ҳақида хабар берган эди. Бугун, 12 август куни Месси ўзининг Instagram саҳифасида отасига бағишланган хайрлашув постини жойлаштирди.

“Ушбу оғир дамда сенга ва оилангга сабр тилайман, Лео. Бардам бўл”, деб ёзди Роналду Мессининг пости изоҳига.

Маълумот учун, Месси ва Роналду футбол тарихида олтита Жаҳон чемпионатида майдонга тушган кам сонли футболчилар ҳисобланади. Месси “Олтин тўп”лар сони бўйича рекордчи (8 та), Роналдуга эса иккинчи натижа (5 та) тегишли.