Расман! “Арсенал” Артета билан шартномани узайтирди

Англиянинг “Арсенал” клуби бош мураббий Микель Артета билан шартномани узайтирди. Бу ҳақда клуб матбуот хизмати хабар берди. 

Томонлар ўртасидаги янги келишув узоқ муддатга мўлжалланган. Журналист Фабрицио Романонинг маълумотига кўра, шартнома 2030 йил июнь ойига қадар амал қилади.

44 ёшли Артета 2019 йилдан буён “Арсенал”ни бошқариб келмоқда. Унинг раҳбарлигида жамоа 2025-2026 йилги мавсумда 22 йиллик танаффусдан сўнг Англия Премьер-лигасида чемпионликни қўлга киритди.

Артета қўл остида “Арсенал” 2020 йилда Англия Кубоги, шунингдек, 2020, 2023 ва 2026 йилларда Англия Суперкубогини қўлга киритди. Жамоа 2025-2026 йилги мавсумда Чемпионлар лигаси финалига ҳам йўл олди, бироқ ҳал қилувчи баҳсда “Пари Сен-Жермен”га мағлуб бўлди.

Маълумот учун, испаниялик мутахассис “Арсенал”га қўшилишидан аввал Пеп Гвардиола бошчилигидаги “Манчестер Сити” мураббийлар штабида фаолият юритган. Футболчилик фаолияти давомида Артета “Пари Сен-Жермен”, Шотландиянинг “Рейнджерс”, Испаниянинг “Реал Сосьедад”, шунингдек, Англиянинг “Эвертон” ва “Арсенал” клубларида тўп тепган.

“Арсенал” сафида у икки марта Англия Кубоги ва икки марта Англия Суперкубогини қўлга киритган. “Рейнджерс” билан эса Шотландия Премьер-лигаси, Шотландия Кубоги ва Шотландия Лига Кубогида чемпион бўлган.