Рақобат қўмитаси “Мактаб бозорлари”да нархларни асоссиз оширмасликка чақирди

Рақобат қўмитаси “Мактаб бозорлари”да савдони амалга ошираётган тадбиркорлик субъектлари ҳамда сотувчиларни бозорларда сотиаётган дарсликлар, мактаб формалари, ўқув-ёзув қуроллари ва бошқа анжомлар нархларини асоссиз оширмасликка чақирди. Бу ҳақда бугун, 19 август куни Рақобатни ривожлантириш ва истеъмолчилар ҳуқуқларини ҳимоя қилиш қўмитаси Telegram-каналида хабар қилди.

Қайд этилишича, бугунги кунда янги ўқув йилига тайёргарлик кўриш доирасида Ўзбекистон ҳудудидаги умумтаълим мактаблари, деҳқон бозорлари ва савдо комплексларида мавсумий “Мактаб бозорлари” ташкил этилган. Ўқув йилига тайёргарлик кўраётган ота-оналар ва ўқувчилар мазкур мавсумий савдо нуқталарига зарур ўқув-ёзув қуроллари, дарсликлар, мактаб формалари ва бошқа ўқув анжомларини сифатли ҳамда ҳамёнбоп нархларда харид қилиш учун ташриф буюради.

Шу сабабли, савдо жараёнларида истеъмолчиларнинг ҳуқуқ ва манфаатларини ҳимоя қилиш, рақобат муҳитини таъминлаш ҳамда аҳолининг сифатли ва ҳамёнбоп маҳсулотларга бўлган эҳтиёжини қўллаб-қувватлаш муҳим ҳисобланади.

Мазкур ҳолатлар юзасидан Рақобат қўмитаси ота-оналар ва ўқувчиларга харид жараёнида маҳсулотнинг сифати, ишлаб чиқарувчиси, нархи ва бошқа муҳим маълумотларига эътибор қаратишларини тавсия қилган. 

Тадбиркорлик субъектларига эса “Мактаб бозорлари”да сотилаётган маҳсулотларнинг сифати, нархларнинг асослилиги, истеъмолчиларга зарур ахборотларнинг тақдим этилиши ҳамда савдо жараёнида истеъмолчилар ҳуқуқларига риоя этилиши шартлигини эслатиб ўтган.

“Юқоридагиларга кўра, Рақобат қўмитаси мактаб бозорларида фаолият юритаётган тадбиркорлик субъектларини дарсликлар, мактаб формалари, ўқув-ёзув қуроллари ва бошқа анжомлар нархларини асоссиз оширмасликка ҳамда белгиланган қонунчилик талабларига қатъий амал қилишга чақиради”, дейилади қўмита огоҳлантирувида.

Фуқаролар мактаб бозорларида нархларни асоссиз ошириш ҳолатларига дуч келганларида бу юзасидан Рақобат қўмитасининг ягона 1159 ишонч рақамига мурожаат қилишлари мумкин.

Маълум қилинишича, қўмита томонидан мактаб бозорларида нарх барқарорлигини таъминлаш борасида мониторинг ишлари олиб борилади.