Путин Новосибирскда “томоша кўрсатди” (видео)

Россия Президенти Владимир Путин жорий йилнинг 11 август куни Новосибирскка ташрифи чоғида аэропорт томон ҳаракатланаётган кортежини тўхтатиб, йўл бўйида уни кутиб турган маҳаллий аҳоли, асосан болалар билан учрашди. Бироқ кейинчалик эълон қилинган видеолар ушбу учрашув олдиндан тайёрлангани ҳақидаги фикрларни юзага келтирди. Бу ҳақда “Meduza” хабар берди. 

Қайд этилишича, Путин аэропорт томон йўл олаётганида кортежини тўхтатиб, уни кутиб турган одамлар олдига борган. Бутунроссия давлат телевидениеси ва радиоэшиттириш компаниясининг тарғиботчиси Павел Зарубин томонидан эълон қилинган видеода Президент атрофини асосан болалар ўраб олгани, Путин улар билан қисқа суҳбатдан сўнг йўлида давом этгани акс этган.

Бироқ ҳодиса жойи яқинидаги уйлар аҳолисининг видеоларида Президентни кутаётганлар олдиндан йиғилгани кўринади. “Инсидент Новосибирск” Telegram-каналига кўра, болалар кортеж ўтишидан анча олдин шу ерга олиб келинган ва айримлари икки соатдан ортиқ кутган. Шу вақт давомида яқин атрофдаги кўчалар ёпилгани сабаб ҳайдовчилар ҳам узоқ тирбандликда қолган.

Эътиборлиси, учрашув ёнилғиси тугаган Teboil АЁҚШи ёнида бўлиб ўтган. Гувоҳлар видеоларида шохобчадаги ёнилғи нархлари акс этган электрон табло ҳам ўчириб қўйилгани кўринади. “Сибирский экспресс”нинг ёзишича, ўша вақтда мазкур АЁҚШда бензин бўлмаган.

Бундан ташқари, Путиннинг ташрифи куни Новосибирскдаги энг қиммат бензин сотадиган айрим АЁҚШлар фаолияти ҳам вақтинча тўхтатилган. “NDN.Info” нашрига кўра, аввал AI-95 бензини литри 125 ва 148 рублдан сотилган “Татнефть” ва “Гранд” тармоқлари ёнилғи сотишни тўхтатган. Президент кортежи ўтадиган йўналишдаги айрим шохобчаларда эса нархлар таблоси ўчириб қўйилган.

“Вот Так” нашри суҳбатдошларидан бири Путиннинг ташрифи куни айрим АЁҚШларда бензин нархлари вақтинча пасайтирилганини ҳам айтган. Аввалроқ, Иркутск ва Красноярск шаҳарларига президент ташрифи арафасида ҳам ёнилғи нархларининг қисқа муддатга туширилгани ҳақида хабарлар тарқалган.

Шунингдек, Новосибирск аҳолиси кўчаларнинг ёпилиши оқибатида юзага келган тирбандликлардан шикоят қилган. Айрим маълумотларга кўра, Академгородокдаги талабалар ҳамда Президент кортежи йўналишидаги уйлар аҳолиси деразадан қарашдан огоҳлантирилган. Гувоҳларнинг видеоларида Путинга қуролланган ва камуфляж кийимидаги хавфсизлик ходимлари ҳамроҳлик қилгани ҳам кўринади.

Маҳаллий аҳолининг сўзларига кўра, Путин ташрифи олдидан Новосибирск марказида асфальт шошилинч равишда янгиланиб, майсазорлар ётқизилган, тротуарлар ва бинолар фасадлари таъмирланган.

“Meduza”нинг қайд этишича, Кремль матбуот хизмати Путиннинг сафарлари давомида оддий фуқаролар билан “кутилмаган” учрашувлари ҳақида тез-тез материаллар эълон қилади. Бироқ бундай учрашувларнинг айримлари аввал ҳам саҳналаштирилгани ҳақидаги даъволар бор.

Эслатиб ўтамиз, аввалроқ Россия Президенти Владимир Путин Япония ҳам ўзиники дея даъво қиладиган баҳсли Курил оролларидан бири – Итурупга ташриф буюрган эди.