Путин болаларга Украинадаги урушни “озуқа занжири” мисолида тушунтиришни таклиф қилди

Россия Президенти Владимир Путин Украинага қарши урушни болаларга тушунтириш учун Арктикадаги озиқ-овқат занжири – косатка ва оқ айиқлар мисолидан фойдаланишни таклиф қилди. Бу ҳақда Путин ўқитувчилар билан учрашуви давомида сўз очди.

Маълум қилинишича, учрашувда Белгород вилоятидан келган педагог Дмитрий Баланчуқов Шимолий қутбга қилган сафари ҳақида сўзлаб берган. Путин ундан у ерда оқ айиқларни кўрган-кўрмаганини сўраган.

Шундан сўнг Россия Президенти Арктикада косаткалар оқ айиқларга галалари билан ҳужум қилиб, уларни “майда балиқлар каби ейиши” ҳақида гапирган.

Путиннинг фикрича, мактабда болаларга шундай озиқ-овқат занжири ҳақида тушунтириш керак. У бу мисол болаларга “нима учун биз махсус ҳарбий операция ўтказаётганимизни” англашга ёрдам беришини айтган.

Маълумот учун, Путин Россия Украинага қарши бошлаган урушни расмий равишда “махсус ҳарбий операция” деб атайди.

Эслатиб ўтамиз, аввалроқ Россия Президенти Владимир Путин 2025 йилнинг охирида ҳарбий қўмондонлар билан ўтказилган йиғилишда 2026 йил учун НАТО ва Европа Иттифоқини ичидан парчалаш вазифасини қўйгани хабар қилинганди.