Пирлони Италия терма жамоасига тайинлаш жараёни тўхтатилди

Италия футбол федерацияси (FIGC) раҳбарияти Андреа Пирлони миллий терма жамоага бош мураббий этиб тайинлаш жараёнини тўхтатди. Бу ҳақда журналист Жанлука Ди Марцио маълум қилди.

Манбага кўра, Пирлонинг тайинланиши юзасидан бугун, 27 июлга режалаштирилган учрашувлар ўтказилмайди. Италия футбол федерацияси иштирокида якунланиши керак бўлган ташкилий жараён ҳам тўхтатилган.

Аввалроқ, 47 ёшли мутахассис терма жамоани бошқаришга розилик бергани ва яқин кунларда шартнома имзолаши кутилаётгани хабар қилинганди. Бироқ унинг Россия билан бизнес алоқалари борлиги сабабли номзоди юзасидан янги саволлар пайдо бўлди.

Пирлонинг ўзи берган баёнотида сиёсатга алоқадорлигини рад этиб, Россия томони билан фақат иш юзасидан муносабатда бўлганини таъкидлади.

Май ойи охирида Пирло Москвада букмекерлик компанияси томонидан ташкил этилган реклама тадбирида иштирок этган. Мутахассис мазкур ташкилот билан расман ҳамкорлик қилиб келмоқда.

У Италия миллий терма жамоасига бош мураббий этиб расман тайинланган тақдирда, компания билан тузилган шартнома автоматик равишда бекор қилиниши керак эди. Бироқ FIGC вазиятни янада батафсил ўрганишга қарор қилди.