Пирло Италия терма жамоаси бош мураббийлиги учун номзодлар қаторидан чиқди

Андреа Пирло энди Италия миллий терма жамоасининг бош мураббийи лавозимига номзод эмаслигини маълум қилди. Бу ҳақда у ўзининг Instagram саҳифасида эълон қилди.

“Кеча кечқурун менга, энди Италия терма жамоаси бош мураббийлиги учун номзод эмаслигимни маълум қилишди”, деб ёзди Пирло.

Аввалроқ, Пирлонинг Италия терма жамоасига тайинланиши Россия букмекерлик компанияси билан ҳамкорлиги туфайли сиёсий баҳсларга сабаб бўлгани хабар қилинган эди. Бир қатор италиялик депутатлар айнан шу ҳамкорлик сабаб унинг номзодига қарши чиққан.

47 ёшли Пирло 2025 йилдан буён БААнинг “Dubai United” клубини бошқариб келмоқда. У ўз фаолияти давомида Туркиянинг “Фотиҳ Карагумрук”, Италиянинг “Ювентус” ва “Сампдория” клубларига ҳам устозлик қилган.

Унинг бошқаруви остида “Ювентус” 2020 йил Италия Суперкубогини ва 2021 йил Италия кубогини қўлга киритган.

Футболчилик фаолиятида Пирло “Брешиа”, “Интер”, “Реджина”, “Милан”, “Ювентус” ва АҚШнинг “Нью-Йорк Сити” клублари шарафини ҳимоя қилган.

У олти карра Италия чемпиони, икки карра Италия кубоги соҳиби, уч карра Италия Суперкубоги ғолиби, икки карра Чемпионлар лигаси ва UEFA Суперкубоги соҳиби, шунингдек, Клублар ўртасидаги Жаҳон чемпионати ғолиби ҳисобланади.

Италия миллий терма жамоаси сафида Пирло 2006 йилги Жаҳон чемпионатида олтин, 2012 йилги Европа чемпионатида кумуш ва 2013 йилги Конфедерациялар кубогида бронза медалини қўлга киритган.