Парагвай президенти банк инқирози ортидан истеъфога чиқди

Парагвай президенти Сантьяго Пенья кеча, 5 ноябрь куни мамлакатдаги йирик рақамли банклардан бири – Ueno фаолиятининг инқирозга юз тутиши ортдан истеъфога чиқди. Банк фаолиятининг тўхташи миллионлаб мижозларнинг ҳисобварақларидан фойдаланиш имкониятини чеклаб, мамлакатда сиёсий ва молиявий инқирозни келтириб чиқарди. Бу ҳақда “Reuters“ хабар берди.

Пенья парламентда унга нисбатан импичмент жараёни бошланишидан бир неча соат олдин лавозимини тарк этган. Бунга унинг ўз партияси – ҳукмрон консерватив Колорадо партияси ичида ҳам қўллаб-қувватловни йўқотгани сабаб бўлган.

Президент ижтимоий тармоқлардаги баёнотида Сенатдаги импичмент жараёнида қатнашиб, ўзини ҳимоя қилиш ҳуқуқидан фойдаланишини билдирган. У буни шахсий ғурур эмас, балки Парагвай халқи олдидаги масъулият деб атаган. Шунингдек, ҳисобварақларига кира олмаётган фуқаролар муаммосини тезроқ ҳал қилишга чақирган.

Инқироз шу ҳафта Парагвай Марказий банки Ueno фаолиятига аралашганидан кейин бошланган. Регулятор тез суръатларда ривожланган рақамли банк тўлов қобилиятига қўйилган энг кам талабларни бузганини маълум қилган. Воқеалар ортдан Марказий банк раҳбари ҳам истеъфога чиққан. Ueno компаниясининг саккиз нафар раҳбарини ҳибсга олиш ҳақида ордер берилган, улар кейинчалик ҳуқуқ-тартибот органларига ўз ихтиёри билан таслим бўлган.

Ueno мамлакатдаги 6,5 миллион аҳолининг қарийб 3 миллион нафарига хизмат кўрсатган. Банк, шунингдек, давлат муассасалари ва пенсия тизимига алоқадор маблағларни ҳисобга олганда, қарийб 850 миллион доллар миқдоридаги давлат маблағларини бошқарган. Унинг инқирозга юз тутиши ортдан мижозлар ўз ҳисобварақларидаги пуллардан фойдалана олмай қолган.

Мухолифат вакиллари Пеньяни банк билан манфаатлар тўқнашувига йўл қўйиш, пенсия маблағларидан нотўғри фойдаланиш ва банк фаолиятини текширувлардан ҳимоя қилишга уринишда айблаган. Президент эса айбловларни рад этган.

Пенья 2023 йилда президент этиб сайланган. Ueno банкининг 2025 йил март ойигача эгаси бўлган Grupo Vazquez бизнес гуруҳи билан аввалги алоқалари ҳам президентга нисбатан танқидларни кучайтирган. Пенья 2025 йил март ойида гуруҳдаги улушини сотганини ва банк фаолиятига ноқонуний аралашмаганини билдирган.

Президентнинг истеъфосидан кейин Парагвай давлат облигациялари нархи пасайган, миллий валюта – гуарани эса АҚШ долларига нисбатан қарийб 5 фоизга қадрсизланган.

Президентлик лавозимини эгаллаш учун навбатдаги номзод бўлган вице-президент Педро Альяна сўнгги кунларда Пеняьдан узоқлашган. У молиявий инқироз ҳал этилмагунча ўзининг президентликка оид режаларини тўхтатиб туришини билдирган.