“Олтин тўп” учун курашда Кейн ва Мбаппе ўртасидаги очко фарқи маълум бўлди

 “Олтин тўп” учун овоз бериш натижаларига кўра, “Бавария” ва Англия терма жамоаси ҳужумчиси Ҳарри Кейн ҳамда “Реал” ва Франция терма жамоаси форварди Килиан Мбаппе ўртасидаги фарқ 40 очкони ташкил этади. Бу ҳақда AS нашри хабар берди.

Нашр талқинига кўра, Кейн 2025-2026 йилги мавсумнинг энг яхши футболчиси деб топилган.

Таққослаш учун, 2024 йилда “Манчестер Сити” ярим ҳимоячиси Родри ва “Реал” ҳужумчиси Винисиус Жуниор ўртасидаги фарқ 41 очко бўлган. 2025 йилда эса ПСЖ вингери Усмон Дембеле 1380 очко тўплаб, совринни қўлга киритган. Иккинчи ўринни эгаллаган “Барселона” ярим ҳимоячиси Ламин Ямаль ундан 321 очко ортда қолган.

2026 йилги рейтингда учинчи ўринни Ламин Ямаль эгаллаган. Шунингдек, кучли ўнликдан Родри, Лионель Месси, Хвича Кварацхелия, Усмон Дембеле, Эрлинг Ҳоланд, Майкл Олисе ва Фабиан Руис ҳам жой олган.

Маълумот учун, “Олтин тўп” учун овоз беришда ҳар бир журналист номзодлар рўйхатидан 10 нафар футболчини танлаб, уларни устуворлик тартибида жойлаштиради. Биринчи ўринга қўйилган футболчига 15 очко, иккинчи ўриндагисига 13 очко, учинчи ўриндагисига 11 очко, тўртинчи ўриндагисига 8 очко ва бешинчи ўриндагисига 7 очко тартибида 10 ўриндаги футболига 1 очко беради. Барча овозлар жамлангач, энг кўп очко тўплаган футболчи соврин соҳиби бўлади.