Оҳангаронда 300 та “локация”га наркотик тарқатаётган “закладчик” ушланди

Тошкент вилоятининг Оҳангарон туманида 300 та “локация”га наркотик тарқатаётган “закладчик” қўлга тушди. Бу ҳақда вилоят Ички ишлар бош бошқармаси хабар берди.

Қайд этилишича, Оҳангарон туманида ўтказилган тезкор тадбирда Навоий вилояти Конимех туманида яшовчи 1996 йилда туғилган А.С. гиёҳвандлик ва психотроп моддаларни контактсиз – манзил усулида тарқатиш (“закладчик”) фаолияти билан шуғулланаётгани аниқланган. У синтетик моддани туманнинг овлоқ ҳудудидаги ерга кавлаб кўмаётган вақтида, далилий ашё билан ушланган.

Ушбу шахснинг телефони кўздан кечирилганда, шу каби 300 га яқин тарқатиш мақсадида яширилган гиёҳвандлик воситаларининг жойлашган “локация”лари мавжудлиги аниқланган.

Ушбу манзиллар бўйича текширув олиб борилган вақтда, ҳар бири 1 граммдан бўлган “мефедрон” синтетик гиёҳвандлик воситалари борлиги аниқланиб, тезкор ходимлар томонидан расмийлаштириб олинган.

Тезкор тадбир натижасида юзлаб фуқароларни заҳарлаши мумкин бўлган синтетик гиёҳвандлик воситалари йўқ қилинган. Ҳолат юзасидан ушланган шахсга нисбатан Жиноят кодексининг 273-моддаси (Гиёҳвандлик воситаларини, психотроп моддаларни ёки уларнинг аналогларини ўтказиш мақсадини кўзлаб қонунга хилоф равишда тайёрлаш, қайта ишлаш, олиш, сақлаш ва бошқа ҳаракатлар қилиш, шунингдек уларни қонунга хилоф равишда ўтказиш) 6-қисми билан жиноят иши қўзғатилиб, тергов ҳаракатлари олиб борилмоқда.

Эслатиб ўтамиз, аввалроқ Самарқандда Telegram орқали фаолият юритган яширин наркотармоқ фош этилганди. Тезкор тадбирлар давомида 44 нафар шахс қўлга олиниб, 1500 дозага тенг мефедроннинг тарқалишига чек қўйилган.