“New port” иши: мажмуадаги 6 та блокда ноқонуний қурилиш бўлаётгани аниқланди

Аввалроқ, ижтимоий тармоқларда “New Port” турар жой мажмуаси ҳудудида яшовчи фуқароларга компенсация пуллари тўлиқ берилмаётгани ҳамда уй ноқонуний бузилгани ҳақида видеомурожаат тарқалганди. Кейинроқ, Тошкент шаҳрининг Яккасарой туманида фуқароларни мажбурий кўчириш бўйича ижро ҳаракатлари якунланмасдан туриб уй ўзбошимчалик билан бузиб ташлангани аниқланганди. Мазкур ҳолат юзасидан Қурилиш ва уй-жой коммунал хўжалиги назорати инспекцияси муносабат билдирди.

Қайд этилишича, “Mega logistics service” МЧЖга тегишли ҳудудда жами 9 та блокда қурилиш-монтаж ишлари амалга оширилмоқда. Шундан 3 та блок бўйича Архитектура ва шаҳарсозлик кенгаши ишчи органининг ижобий хулосаси ҳамда тегишли ижобий экспертиза хулосалари мавжуд.

Ушбу ҳужжатлар асосида мазкур блокларда қурилиш-монтаж ишларини бошлаш учун Тошкент шаҳар ҳудудий назорат қилиш инспекциясидан белгиланган тартибда рўйхатдан ўтказилган. Қолган 6 та блокда эса қурилиш-монтаж ишлари Инспекциядан белгиланган тартибда рўйхатдан ўтказилмасдан олиб борилаётгани назорат тадбирлари давомида аниқланган.

Аниқланган ҳолатлар юзасидан буюртмачи – “Mega logistics service” МЧЖга бир неча марта бажарилиши мажбурий бўлган ёзма кўрсатмалар берилган. Уларда қурилиш-монтаж ишларини белгиланган шаҳарсозлик ҳужжатлари асосида ҳамда объектни инспекциядан тегишли тартибда рўйхатдан ўтказган ҳолда амалга ошириш талаб этилган.

Бироқ ёзма кўрсатмаларда белгиланган талаблар бажарилмагани сабабли буюртмачининг масъул мансабдор шахслари белгиланган тартибда маъмурий жавобгарликка тортилган. Шунингдек, буюртмачининг техник назоратчисига нисбатан тегишли тақдимнома киритилиб, таъсир чоралари қўлланилган.

Бундан ташқари, мазкур ҳолатлар бўйича инспекция томонидан тўпланган ҳужжатлар тегишли ҳуқуқий баҳо бериш учун ҳуқуқни муҳофаза қилувчи органларга юборилган.

Билдирилишича, мазкур объектда аниқланган қонунбузилиш ҳолатлари инспекция томонидан эътиборсиз қолдирилмаган. Аксинча, улар юзасидан белгиланган тартибда назорат тадбирлари ўтказилиб, ваколат доирасида тегишли таъсир чоралари қўлланилган ҳамда қонунбузилишларга ҳуқуқий баҳо берилишини таъминлаш бўйича зарур чоралар кўрилган.

Эслатиб ўтамиз, ҳолат юзасидан “Mega Logistics Servise” МЧЖ мансабдор шахслари ва бошқаларга нисбатан жиноят иши қўзғатилган. Ҳозирда Тошкент шаҳар прокуратураси томонидан дастлабки тергов ҳаракатлари олиб борилмоқда.