Netflix тарихидаги энг йирик қисқартириш: мингга яқин ходим ишидан айрилади

Netflix компанияси ходимларининг қарийб 6 фоизини ишдан бўшатишга қарор қилди. Бу компания тарихидаги энг йирик қисқартириш бўлиб, мингга яқин иш ўрни йўқ қилинади. Бу ҳақда “Variety” нашри хабар берди.

Қайд этилишича, қисқартиришлар, асосан, компаниянинг маҳсулот, технология, юридик ва кадрлар билан ишлаш бўлимларига таъсир қилади. Netflix ҳамраислари Тед Сарандос ва Грег Питерс ходимларга йўллаган мактубида бундай қарорлар осон бўлмаслигини таъкидлаган.

Уларнинг сўзларига кўра, компаниянинг асосий вазифаси дунё бўйлаб томошабинларни кўнгилочар контент билан таъминлаш бўлиб, бунинг учун мавжуд ходимлар ва ресурслардан самарали фойдаланиш зарур. Раҳбарият қисқартиришга қарамай, хизмат сифатини яхшилаш, ўсиш ва инновацияларни ривожлантиришга сармоя киритишда давом этишини билдирган.

Netflix раҳбарияти компания бизнеси барқарор ўсиб бораётганини ва жорий йил учун белгиланган молиявий прогнозлар бажарилиши кутилаётганини ҳам қайд этган.

Маълумот учун, 2025 йил якунида Netflix’да қарийб 16 минг нафар тўлиқ штатда ишловчи ходим бўлган. Компания 2025 йилда 45,2 миллиард доллар даромад олган, соф фойдаси эса 11 миллиард долларни ташкил этган.

Netflix бундан олдин, 2022 йилда ҳам йирик қисқартиришлар ўтказиб, тахминан 450 нафар ходимини ишдан бўшатган. Ўшанда компаниянинг соф обуначилари сони йилнинг биринчи чорагида 200 минг нафарга камайган ва бу ўн йилдан ортиқ вақт ичида илк шундай пасайиш бўлган.

Компания 2026 йил учун даромадини 51-51,4 миллиард доллар оралиғида прогноз қилмоқда. Netflix’нинг учинчи чорак молиявий натижалари 20 октябрь куни эълон қилиниши кутилмоқда.

Эслатиб ўтамиз, аввалроқ Норвегиянинг энг йирик банки – DNB сунъий интеллект ва рақамли ечимлардан фойдаланишни кенгайтириши ортидан қарийб 400 нафар ходимини ишдан бўшатиши ҳақида хабар берилган эди.