Наманганда электр тармоқлари ходимлари $2,5 минг пора билан қўлга тушди

Наманган шаҳрида “Ҳудудий электр тармоқлари” АЖ “Энергосавдо” филиалининг Янги Наманган тумани бўлими бошлиғи ва устаси 2,5 минг АҚШ доллари пора олаётган вақтда ушланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.

Қайд этилишича, бўлим бошлиғи Ф.А. ва уста А.А. ўзаро тил бириктириб, фуқаро Б.К. га тегишли “Гўзал” МФЙ ҳудудидаги нотурар бинода ўрнатилган электр ҳисоблагич носоз эканини айтган. Улар ушбу ҳолат бўйича далолатнома расмийлаштирилса, фуқарога 300 миллион сўм жарима қўлланилишини билдирган.

Шундан сўнг, улар 4 минг АҚШ доллари эвазига далолатнома расмийлаштирмасликни таклиф қилган. Тезкор тадбир давомида келишилган пулнинг 2,5 минг долларини олаётган вақтда ҳар иккиси ашёвий далиллар билан ушланган.

Билдирилишича, мазкур ҳолат юзасидан Жиноят кодексининг 210-моддаси (пора олиш) ва 212-моддаси (пора олиш-беришда воситачилик қилиш) билан жиноят иши қўзғатилган. Ҳозирда тергов ҳаракатлари олиб борилмоқда.

Эслатиб ўтамиз, аввалроқ Хоразмда “Хоразм сув таъминоти” АЖ юридик инспектори савдо шохобчасини ичимлик суви тармоғига улаш учун 6 млн сўмни фирибгарлик йўли билан олган вақтида ушлангани ҳақида хабар берилган эди.