Мьянмалик актёр қамоқхонадалигида дунёнинг энг келишган эркаги унвонини олди

Мьянмалик актёр ва модель Паинг Тахон 2021 йилда қамоқда ўтирган вақтида дунёнинг энг келишган эркаги деб топилган. Бу ҳақда “The day” хабар берди.

Қайд этилишича, Паинг Тахон 1996 йилда Мьянманинг Котаун шаҳрида туғилган. У оиладаги олти фарзанднинг тўртинчиси бўлган. 18 ёшида Янгон шаҳрига бориб, моделлик мактабида ўқиган ва кўп ўтмай ўз фаолиятини бошлаган.

Унинг узун сочлари, татуировкалари ва спортчиларга хос гавдаси тезда мухлислар эътиборини тортган. Шу сабабли унга “осиёлик Аквамен” лақаби ҳам берилган.

Паинг Тахон кейинчалик актёрлик ва хонандалик билан ҳам шуғулланган. 2017 йилда у “Midnight Traveller” фильмида бош ролни ижро этган. Унинг ижтимоий тармоқлардаги саҳифаларини эса миллионлаб одам кузатган.

2020 йилда у TC Candler томонидан тузиладиган дунёнинг энг келишган эркаклари рейтингида 10-ўринни эгаллаган.

2021 йил бошида эса модель кутилмаган қарор қилган. У сочини қирдириб, буддист монастирига борган ва у ерда икки ҳафта яшаган. Паинг Тахон бу вақт давомида ибодат қилгани, рўза тутгани ва медитация билан шуғулланганини айтган.

Бироқ ўша йил унинг ҳаётида яна бир катта ўзгариш юз берган. 2021 йил 1 февраль куни Мьянмада ҳарбийлар ҳокимиятни эгаллаганидан сўнг мамлакат бўйлаб норозилик намойишлари бошланган. Паинг Тахон ҳам намойишчиларга қўшилган. У ижтимоий тармоқларда ҳарбий тўнтаришни танқид қилган ва мамлакат келажагини фуқароларнинг ўзи белгилаши кераклигини билдирган.

2021 йил 8 апрель куни ҳарбийлар уни онасининг уйидан олиб кетган. Шундан кейин унинг ижтимоий тармоқлардаги саҳифалари ҳам ўчирилган.

Кейинчалик суд Паинг Тахонни уч йилга озодликдан маҳрум қилиш ва мажбурий меҳнатга жалб этишга ҳукм қилган. Айнан шу пайтда TC Candler 2021 йилги рейтинг натижаларини эълон қилган. Унга кўра, Паинг Тахон дунёнинг энг келишган эркаги деб топилган. Яъни у мазкур унвонни қамоқда бўлган вақтида қўлга киритган.

Эслатиб ўтамиз, аввалроқ Жанубий Корея пойтахти Сеулда “энг гўзал қотил” деб лақаб олган 20 ёшли Ким Со Ён эркакларни заҳарлаш иши бўйича умрбод озодликдан маҳрум этилгани ҳақида хабар берилган эди.