Москвада украиналик собиқ мулозимнинг автомобили портлади (видео)

Бугун, 13 ноябрь куни Россия пойтахти Москвада автомобиль портлаб кетди. Россия ОАВлари машина Украина собиқ бош вазирининг собиқ матбуот котибига тегишли экани ҳақида хабар бермоқда. 

Йирик “Mash” Telegram-канали автомобиль Москванинг Чертаново туманидаги Кировоградская кўчасида жойлашган турар жой биноси яқинида портлаганини хабар қилди. Гувоҳларнинг сўзларига кўра, газ портлашига ўхшаш кучли гумбурлаш овози эшитилган.

SHOT нашрининг ёзишича, қора рангли Toyota йўлтанламаси ҳовлидан чиққанидан сўнг тахминан 200 метр юрган, шундан кейин портлаш содир бўлган. Ҳодиса оқибатида ҳайдовчи жабрланган – уни портлаш тўлқини йўлнинг қатнов қисмига улоқтириб юборган. Шифокорлар унга зарур тиббий ёрдам кўрсатгани хабар қилинмоқда.

Telegram-канал маълумотларига кўра, портлаган автомобиль тарих фанлари номзоди, Украина собиқ бош вазири Николай Азаровнинг собиқ матбуот котиби, 72 ёшли журналист Сергей Заворотний номига расмийлаштирилган. Хабарларда жабрланувчининг кўкрак қафаси ва орқа қисмида жароҳатлар, шунингдек, оёқларида оғир шикастланишлар борлиги айтилмоқда.

“Baza” Москвадаги йўлтанламас портлашининг дастлабки сабаби сифатида машина остига ўрнатилган қўлбола портловчи қурилма кўрсатилаётганини маълум қилган. Нашрнинг аниқлик киритишича, автомобиль эгаси илгари Украина собиқ бош вазири Николай Азаровнинг матбуот котиби бўлиб ишлаган, 2004 йилгача эса Россия Федерацияси Давлат думасида фаолият юритган. У медиа ва сиёсат соҳаларига ихтисослашган.

Тергов қўмитаси матбуот хизмати РИА Новостига Москвадаги Кировоградская кўчасида автомобиль портлаганини тасдиқлаган. Воқеа жойига Россия Тергов қўмитасининг пойтахт бўйича Бош тергов бошқармаси тергов гуруҳи етиб борган. Жиноят иши қўзғатилган.

Эслатиб ўтамиз, аввалроқ Санкт-Петербургнинг Пушкин туманида автомобиль портлаши оқибатида ҳарбий хизматчи ҳалок бўлганди. Ҳодиса ортидан қотиллик факти бўйича жиноят иши қўзғатилган.