Microsoft сервисларида глобал узилиш юз берди

Microsoft компаниясининг Outlook, Teams ва Copilot хизматларида глобал носозлик кузатилди. Узилиш 74 та мамлакат ва ҳудуддаги ўн минглаб фойдаланувчиларга таъсир кўрсатди. Бу ҳақда DW хабар берди. 

Маълум қилинишича, носозлик бугун, 13 ноябрь куни юз берган ва беш соатдан ортиқ давом этган. Фойдаланувчилар электрон почталарига кира олмаган, шунингдек, Microsoft’нинг бошқа хизматларидан фойдаланишда ҳам муаммоларга дуч келган.

Microsoft 365 Status саҳифасида компания Шимолий ва Жанубий Америкадаги фойдаланувчилардан Exchange Online почта хизматига уланиш билан боғлиқ шикоятлар келиб тушганини билдирган. Кейинчалик бундай муаммолар бошқа ҳудудларда ҳам кузатилиши мумкинлиги маълум қилинган.

Компания носозликка айрим ҳудудлардаги инфратузилмага тушган юқори юклама сабаб бўлганини билдирди. Бироқ бунга интернет-трафикнинг ортиши сабаб бўлмаган. Microsoft маълумотлар оқимини муқобил йўналишларга ўтказганидан сўнг хизматлар фаолияти босқичма-босқич тиклана бошлаган.

Узилиш бошқа компаниялар фаолиятига ҳам таъсир кўрсатди. Жумладан, электр юк машиналари ишлаб чиқарувчи Workhorse Group дастурий таъминотдаги муаммолар сабаб чораклик ҳисоботини тақдим этишни 16 ноябрга қолдирган.

Шунингдек, OpenAI ва Anthropic компаниялари Microsoft 365 инфратузилмасидан фойдаланадиган айрим воситаларида ҳам носозликлар кузатилганини билдирган. Хусусан, иловалар ўртасида маълумот алмашиш ва уларни боғлаш учун ишлатиладиган коннекторлар кутилганидек ишламаган.

Эслатиб ўтамиз, аввалроқ Microsoft компанияси 2027 йилда Windows 12 операцион тизимини тақдим этмаслиги, унинг ўрнига Windows 11’нинг 27H2 версиясини чиқариши мумкинлиги ҳақида хабар берилган эди.