Мессига рақобатчи йўқ – Суарес 

Мадриднинг “Атлетико” клуби ҳужумчиси Луис Суарес 2021 йилги “Олтин тўп” учун асосий фаворит ким эканини айтди.

Уругвайлик футболчининг фикрича, “France football” нашрининг соврини ПСЖда ўйнаётган аргентиналик ҳужумчи Лионель Мессига насиб этади.

“Лео “Олтин тўп”ни қўлга киритади. У “Барселона” билан фақат Испания кубогини қўлга киритганига қарамай, ўзи учун ажойиб йилни ўтказди. Месси Ла лиганинг энг яхши тўпурари ва ассистенти бўлди, шунингдек, Америка кубогини қўлга киритди. Бу эса унинг имкониятларини оширади. Соврин ғолибини аниқлаш учун, нафақат ўйинчининг йил давомида кўрсатган ўйини, балки унинг ўзи учун эришган ютуқларига ҳам эътибор қаратиш лозим. Менимча, Леонинг рақобатчилари йўқ”, дейди Суарес.

Аввалроқ, “Олтин тўп”ни қўлга киритиш эҳтимоли юқори бўлган футболчилар ҳақида маълумот берган эдик. 

Эслатиб ўтамиз, совринни топшириш маросими жорий йилнинг 29 ноябрь куни Парижда бўлиб ўтади. Месси ушбу мукофотнинг олти карра ғолиби ҳисобланади.