Месси терма жамоада қоладими? AFA президенти жавоб берди

Аргентина футбол ассоциацияси (AFA) президенти Клаудио Тапия Лионель Мессининг миллий терма жамоадаги келажаги ва фаолиятини якунлаши мумкинлиги ҳақида фикр билдирди. Бу ҳақда у 442 нашрига берган интервьюсида сўз очди.

“Бу фақат унинг шахсий қарори. Биз уни хотиржам қўйишимиз керак. 2022 йилда унинг 2026 йилги Жаҳон чемпионатида ўйнашини билмас эдик. У ҳар бир ўйиндан кейин вазиятга баҳо беришимиз кераклигини айтганди. Менимча, Жаҳон чемпионатида биз Леонинг ажойиб, балки энг яхши версиясини кўрдик. Биз унга футболдан завқланишда давом этиш имконини беришимиз, кейин эса ўзи тўғри деб ҳисоблаган қарорни қабул қилишига қўйиб беришимиз керак”, дейди Тапия.

AFA раҳбари Мессининг 2026 йилги Жаҳон чемпионатидаги иштирокини ҳам юқори баҳолади.

“Бу Лео учун ажойиб Жаҳон чемпионати бўлди. Биз унинг ўйинидан жуда завқландик ва у билан фахрланишимиз керак. Мен ҳар бир лаҳзадан завқ олдим. У, шубҳасиз, Жаҳон чемпионатида жамоамизнинг етакчиси эди.

Агар унинг ўйинини таҳлил қилсангиз, мен учун у турнирнинг энг яхши футболчиси бўлди. У деярли ҳар бир ўйинда янги рекордларни ўрнатди”,  дея қўшимча қилди Тапия.

Эслатиб ўтамиз, аввалроқ Месси Аргентина терма жамоасида бошқа ўйнамаслиги мумкинлиги ҳақида хабарлар тарқалган эди. Бироқ футболчининг ўзи ҳозирча миллий жамоадаги келажаги борасида расмий баёнот бермаган.