Мерц Германияда илк бор аёл киши президент бўлишини тарғиб қиляпти

Германия канцлери Фридрих Мерц мамлакатнинг навбатдаги федерал президенти лавозимига аёл номзодни илгари сурмоқчи. Бу ҳақда “Deutsche Welle” хабар берди.

Мерц кеча, 2 ноябрь куни Берлинда Христиан-демократик иттифоқи (ХДИ) ҳудудий бўлимлари раҳбарлари билан ўтказилган ёпиқ йиғилишда навбатдаги президент аёл бўлиши кераклигини билдирган. Канцлер партияси учун марказий сиёсий кучлар вакили бўлган ягона аёл номзодни таклиф қилмоқчи.

Учрашувда Мерц аниқ бир номзоднинг исмини айтмаган. Кутилишича, у номзодни жорий йилнинг 9 ноябрь куни бўлиб ўтадиган ХДИ президиуми йиғилишидан кечиктирмай эълон қилади.
Мерцнинг қарорини Германиядаги ҳукумат коалициясининг ҳамкори бўлган Социал-демократик партия (СДП) ҳам ижобий кутиб олган. Партия вакили Дирк Визе мамлакатнинг энг юқори давлат лавозимини аёл эгаллаши вақти келганини таъкидлаган.

Аввалроқ, Германиянинг собиқ канцлери Ангела Меркель ҳам навбатдаги федерал президент аёл бўлиши кераклигини билдирган эди. Унинг қайд этишича, Германия Федератив Республикаси ташкил топганига 77 йил бўлган бўлса-да, шу вақтгача мамлакатда бирор аёл федерал президент лавозимини эгалламаган.

Ҳозирча президентликка бир нечта номзод муҳокама қилинмоқда. Улар орасида Бавария парламенти раҳбари Илзе Айгнер, Бундестаг раиси Юлия Клёкнер, таълим вазири Карин Приен ҳамда собиқ мудофаа вазири Аннегрет Крамп-Карренбауэр бор.

Амалдаги президент Франк-Вальтер Штайнмайер икки муддат фаолият юритгани сабабли яна номзодини илгари сура олмайди. Германиянинг янги федерал президенти 2027 йил 30 январь куни Федерал йиғилиш томонидан сайланиши керак.
Ҳозирча бирорта номзод расман кўрсатилмаган.

Эслатиб ўтамиз, аввалроқ Болгарияда президентлик сайловининг иккинчи турида амалдаги давлат раҳбари Илиана Йотова ғалаба қозониб, мамлакат тарихида илк бор аёл президент сайлангани ҳақида хабар берилган эди.