Мелания Трамп Путин ва Зеленскийга шахсий мактуб ёзди

АҚШнинг биринчи хоними Мелания Трамп кеча, 5 ноябрь куни Олешкида гуманитар миссия якунланганидан сўнг Оқ уйда Россия ва Украина вакилларининг учрашувини ўтказди. Бу ҳақда Оқ уй сайтида хабар берилди.

Қайд этилишича, Америка етакчисининг турмуш ўртоғи Россия Президенти Владимир Путин ва Украина етакчиси Владимир Зеленскийга шахсий мактубларни топширган. Уларнинг мазмуни ошкор этилмаяпти.

Мелания Трамп билан ўтказилган учрашувда Россия томонидан Президентнинг махсус вакили Кирилл Дмитриев ва Инсон ҳуқуқлари бўйича вакил Яна Лантратова иштирок этган. Украина шарафини омбудсман Дмитрий Лубинец ва “Слуга народа” парламент фракцияси раҳбари Давид Арахамия ҳимоя қилган.

Қўшма Штатларнинг биринчи хоними операцияни режалаштиришда шахсан иштирок этганини, миналардан тозалаш хариталарини, эвакуация йўналишларини ва тиббий ёрдам етказиб бериш йўлларини ўрганиб чиққанини айтган. У Москва ва Киевнинг биргаликдаги иши давом этишига умид билдирган.

“Умид қиламанки, бу янада кенг кўламли тинчликни ўрнатиш учун асос бўлиб хизмат қилади. Бу ташаббуснинг камтарлиги эмас, балки уни ғайриоддий бир нарсага айлантириши муҳимдир”, дейди Мелания Трамп.

Унинг сўзларига кўра, бегуноҳ одамларнинг ҳаёти уруш келтириб чиқарган келишмовчиликлардан муҳимроқ бўлиши керак.

АҚШ биринчи хоними, шунингдек, Россия ва Украина Президентларига гуманитар миссияни ташкил этишда кўрсатган кўмаги учун миннатдорлик билдирган.

Украина делегацияси Мелания Трампга Владимир Зеленский томонидан берилган I даражали княгиня Ольга орденини топширган.

Эслатиб ўтамиз, Олешкидаги гуманитар миссия Америка етакчиси турмуш ўртоғининг ташаббуси билан ташкил этилган эди. Россия ва Украина унинг кўмагида гуманитар операцияни таъминлаш учун ўт очишни тўхтатишга рози бўлган. Қамал остидаги шаҳарда асосан кексалардан иборат 2 мингга яқин киши ва 50 га яқин болалар қолаётган эди. Иккала мамлакат вакиллари оилаларнинг эҳтиёжларини баҳолаган ҳамда Россия ёки Украинага кетишни хоҳлаганлар учун транспорт билан таъминлаган. 

Олешки шаҳри Херсон вилоятида жойлашган. Киев уни босиб олинган ҳудуд деб атайди. Аҳоли пунктида электр энергияси, сув, иссиқлик, мунтазам равишда озиқ-овқат ва дори-дармонларни етказиб бериш имконияти йўқ. Кескин ўққа тутишлар ва дронларнинг доимий ҳужумлари сабабли у ерга қуруқлик орқали кириш қийинлашган.