Мбаппе Мессининг Чемпионлар лигасидаги рекордини янгилади

“Реал Мадрид” ҳужумчиси Килиан Мбаппе UEFA Чемпионлар лигаси ўйинлар ўтказиш бўйича рекордни янгилади. Бу ҳақда “The National” нашри хабар берди. 

Манбага кўра, француз футболчиси мусобақада 100 та учрашувда майдонга тушган энг ёш футболчига айланган.

Мбаппе ушбу маррага Чемпионлар лигасининг иккинчи босқичида Италиянинг “Рома” жамоасига қарши ўйинда эришди. Бу пайтда ҳужумчи 27 ёш 298 кунлик эди.

Шу тариқа у турнирдаги 100-учрашувини 28 ёш 84 кунлигида ўтказган Лионель Мессидан ўзиб кетди. “Реал Мадрид”нинг собиқ ҳужумчиси Рауль Гонсалес эса ушбу кўрсаткич бўйича учинчи ўринда – у 100-ўйинини 28 ёш 239 кунлигида ўтказган.

Шунингдек, Мбаппе “Рома”га қарши баҳсда гол ҳам уриб, Чемпионлар лигасидаги голлари сонини 72 тага етказди. Бу орқали у Раулнинг 71 голлик натижасидан ўзиб кетди ва мусобақа тарихидаги энг яхши тўпурарлар рўйхатида бешинчи ўринга кўтарилди.

Маълумот учун, “Реал Мадрид” Чемпионлар лигаси ортда қолган икки туридан сўнг 6 очко тўплаган ҳолда турнир жадвалида 8-поғонада бормоқда.